Brynjubúrfiskur
- Astrid Andreasen teknaði.
Brynjubúrfiskur, Skjaldbrystlingur (búrfiskaættin)
Hoplostethus mediterraneus mediterraneus Cuvier, 1829
Stødd: Brynjubúrfiskur verður neyvan longri enn 40 cm.
Dýpi: Hann er úr 200 m niður á 900 m.
Litur: Oman fyri strikuna er hann bleikt reydligur, ljósareyður. Um síðurnar er liturin svart-silvur, reyðari um høvdið enn um bakið. Fjaðrarnar eru reyðari enn kroppurin.
Teinar: R VI + 13-14; G II + 11; U 14-16; B I + 6.
Lýsing: Brynjubúrfiskur hevur høgt og flatt kropsskap. Hann hevur eina stóra ryggfjøður, eina gotfjøður. Uggafjaðrarnar og búkfjaðrarnar eru miðalstórar. Sterturin er nógv sýldur. Høvdið er millum 36 - 43% av standardlongdini. Hann hevur stór eygu, umleið 33% av høvuðlongdini, og høvdið er nærum eins høgt og langt. Kjafturin er á skák uppeftir og frameftir. Gronin gongur næstan beint niður framman fyri eyguni. Kjálkarnir og kápan eru klædd við beinplátum og hava píkar. Hann hevur týðiligt og hvast kjalarskrubb.
Eyðkenni: Hann minnir í litum og skapi um búrfisk, fagurserk og reyðserk. Beinpláturnar og harða kjalarskrubbið. Eygnastøddin og høvuðstøddin.
Týdningur: Brynjubúrfiskur hevur ikki vinnuligan týdning.
da: Middelhavssavbug, en: Silver roughy - Rosy soldier fish, fr: Hoplostète argenté, ís: Búrfiskbróðir
 |  Útbreiðsla: Nakrir fáir brynjubúrfiskar fáast viðhvørt í hellingunum suður av Bankarygginum og bankunum vestanfyri. Annars er hann norður gjøgnum alt Atlantshavið, frá Suðurafrika til Íslandsryggin, Miðjarðarhavið, Indiahavið, Reyðahavið og Kyrrahavið. Hann er í Karibiahavinum og Meksikoflógvanum. | |
Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.
| Serkafiskar Beryciformes Hesin hópurin hevur 7 ættir við 29 slektum og 144 sløgum. Undir Føroyum eru 3 ættir, ið hava 3 slektir og 5 sløg:
Teir eru smalir og nakað hávaksnir fiskar. Summir hava eina ryggfjøður, aðrir tvær, flestu við beinteinum í framparti av ryggfjaðrunum. Eina gotfjøður, ofta við beinteinum fremst, flestu við stórum, sýldum sterti. Serkafiskar eru djúpvatnsfiskar, silvurblankir, reydligir og brúnsvartir. | |