Slætta langasporl
- Bente Olesen Nystrøm teknaði.
Slætta langasporl (langasporlsættin)
Nezumia aequalis (Günther, 1878)
Stødd: Slætta langasporl verður í mesta lagi 36 cm langt.
Dýpi: Tað er úr 200 m niður á 2300 m.
Litur: Tað er viólblátt í svartblátt og svartleitt um høvdið. Veikur silvurlitur er um búkin og undir sporlinum.
Teinar: R1 12-13; U 18-21; B 8-9.
Lýsing: Slætta langasporl hevur tvær ryggfjaðrar, tann fremra er lítil men høg. Tann aftara fjøðurin er heilt lág og long, byrjar frammi undir teirri fremru, niðurløgdu ryggfjøðurini og gongur heilt út á sporlsendan, har hon rennur saman við gotfjøðurini.
Gotið situr mitt undir fremra ryggfjøðurfesti, og gotfjøðurin byrjar beint aftanvert gotið og gongur heilt aftur um sporlsendan. Stertur er eingin. Langar teinar fremst á búkfjaðrunum. Stykkið frá trantinum til fremru ryggfjøður er mest sum ein bein linja.
Tað hevur lítið, upprent høvd og stór eygu. Høvdið er sett við hvassari roðslu, tó ikki á einum lítlum petti undir trantinum, sum er roðsluleyst. Tað hevur lítla finnu. Kjaftklovin kemur næstan til aftaru rond á eygunum. Tað hevur ‘beinkamb’ undir eygunum. Fiskurin er hægstur við fremra kantin á fremru ryggfjøður.
Eyðkenni: Fremsti teinur í fremru ryggfjøðurini er „tentur“ frameftir. Uggafjaðrarnar eru heldur fremri enn fremra ryggfjøður. Kennist m.a. frá kubbuta og rísna langasporli á tí, umframt á litinum og støddini, at gotfjøðurin byrjar fremri.
Týdningur: Slætta langasporl hevur ikki vinnuligan týdning.
da: Glat skolæst, en: Smooth grenadier, ís: Litli langhali, no: Høyrygget skolest
 |  Útbreiðsla: Slætta langasporl er sunnan fyri Íslandsryggin og út av bankunum vestanfyri. Gjøgnum hellingina til Angola í Afrika. Í Miðjarðarhavinum, við Asoroyggjar og Madeira. Er eisini í Vesturatlantshavinum, frá Nýfundlandi til Norðurbrasil. | |
Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.
| Toskafiskar Gadiformes Hópurin við toskafiskum hevur 9 ættir 75 slektir og 555 sløg. Undir Føroyum eru 5 ættir ið hava 26 slektir og 36 sløg:
Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar. Nógv av sløgunum hava grunnnøs. Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni. | |