Upsi
- Astrid Andreasen teknaði.
Upsi, seiður (toskaættin)
Pollachius virens (Linné, 1758)
Stødd: Upsi verður upp í 130 cm langur. Í veiðuni er hann vanliga 55-120 cm.
Dýpi: Upsi er bæði botnfiskur og uppsjóvarfiskur. Hann er úr vatnskorpuni og út á umleið 450 m. Undir Føroyum veksur hann upp inni við land og nevnist tá ternumurtur fyrsta árið, ársgamal summarseiður, 2 og 3 ára gamal ávikavist seiður og stórseiður. Tá hann er um 40 cm og um 3 ára gamal, fer hann til havs. Vanligasta dýpi hansara er 75-200 m. Litur: Hann er heilt dimmur um bakið, koksgráur, blásvartur. Síðurnar og búkurin eru ljós, hvítgrálig ella silvurkend, ljósastur er hann undir búkinum. Strikan er ljóst grá.
Teinar: R1 13-14; R2 20-22; R3 20-24; G1 25-28; G2 19-23.
Lýsing: Upsi hevur tríggjar ryggfjaðrar, tvær gotfjaðrar. Fremra gotfjøður er umleið líka long sum mittasta ryggfjøður, ið er tann longsta ryggfjøðurin. Gotið er umleið beint undir aftara enda á fremstu ryggfjøður. Smáur upsi hevur lítla finnu, teir størru onga ella bert ein viðfáning. Hann hevur undirbit. Strikan er bein og sterturin bert eitt sindur innbogin.
Eyðkenni: Tann ljósa og beina strikan og tann svart-døkki liturin.
Týdningur: Nógv verður veitt av upsa, og hann hevur stóran týdning.
da: Sej – mørksej – gråsej, en: Saithe – Coalfish – Coley, fr: Colin noir, ís: Ufsi, no: Sei, tý: Köhler
Sí myndir og videoklipp her.
 |  Útbreiðsla: Upsi er vanligur undir Føroyum, bæði við land og til havs. Hann er annars við Svalbarð og Novaja Semlja, suður í Norðsjógvin og Skagerrak, kring Bretsku Oyggjarnar, í Biskeiavíkini. Undir Eysturog Vesturgrønlandi, við Labrador til North Carolina. | |
Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.
| Toskafiskar Gadiformes Hópurin við toskafiskum hevur 9 ættir 75 slektir og 555 sløg. Undir Føroyum eru 5 ættir ið hava 26 slektir og 36 sløg:
Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar. Nógv av sløgunum hava grunnnøs. Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni. | |