• Yvirlit
  • Prenta
  • RSS hald
Tú ert her:

Um temasíðuna

Henda temasíðan er um at nýta blogg í skúlanum. Høvuðsdenturin verður lagdur á skriving og KT-førleika. Mitt fyri á temasíðuni eru sjey uppskot, sum stigvíst brúka blogg í undirvísingini. Eisini er alment tilfar á síðuni um at blogga og at brúka kunningartøkni.

Temasíðan er ætlað lærarum og næmingum í hádeildini í fólkaskúlanum.

Bøkur um at blogga

Í Námi eru fleiri útlendskar bøkur um at blogga og hvussu ein bloggur, ella fleiri bloggar, kunnu brúkast í skúlanum.

Forlagið Dansklærer-foreningen hevur givið út @ltid online (2012), sum er til 7.-8. flokk.
Sama forlag hevur givið út vores.net (2012), ið er um bloggar og aðrar miðlar, sum brúkarin sjálvur ger av, hvussu teir virka, og hvat innihald teir hava.
Forlagið Alfabeta hevur givið út Skriv godt - i flere genrer (2016), har ein partur er um at skriva blogg. Eisini verður roynt at greina blogg sum eitt serligt slag av teksti millum klummu og tíðargrein.

Skúlabókavørðurin í Námi veit altíð at siga, hvørjar bøkur og hvat tilfar er tøkt at lána ella lesa í.

At blogga í netsamfelagnum

Í viku 44 í 2015 verður tiltakið "Skúlin í netsamfelagnum" í Norðurlandahúsinum. Regin Marnersson, stjóri í Námi, sigur m.a. soleiðis um tiltakið: Samtíðin setur støðugt strangari krøv á talgilda pallinum. Mangan verður sagt, at børnini eru framkomnari brúkarar enn tey vaksnu, sum so ella so eru um tey í gerandisívinum.

Tá talan eru um fakligar avbjóðingar, menning og at nýta mongu skíggjarnar sum verulig arbeiðsamboð, skortar við førleikum millum børnini og tey ungu í skúlaverkinum. Tí er neyðugt at styrkja førleikarnar hjá lærarum, so at mongu skíggjarnir kunnu gerast hent amboð ...les meira her

 

Bloggur í undirvísingini

 

Niðanfyri eru sjey uppskot um, hvussu bloggur kann nýtast í hádeildini í fólkaskúlanum

  • Eg

    Uppgávan er at lýsa staðin, her, ið eg búgvi. Lærarin skipar fyrst fyri hugaroki í skúlastovuni. Hvat er beint her í grannalagnum? Hvønn vegin gangi eg í skúla? Hvat er klokkan? Hvat síggi eg á veg í skúla? Er nakar dagur, sum er øðrvísi enn aðrir dagar? Síggi eg ruskbilin onkran dagin? Hvør annar býr í grannalagnum? Eru hundar og kettur í grannalagnum? Eigi eg eina ættartalvu heima við hús? Eiga vit eitt gamalt fotoalbum? Tak egnar myndir og skriva tekst, sum í smásøgum stuðla upp undir eina sannførandi og persónliga søgu, sum í heildini lýsa teg og umhvørvið. 

  • Flokkurin

    Uppgávan er at lýsa tín skúla og tína frítíð. Lærarin skipar fyrst fyri hugaroki í skúlastovuni. Tak myndir av skúlanum, uttan at geva tær far um lærugreinarnar. Hugsa tær, at tú ert ein fremmandur, sum vitjar. Nú gert tú reportasju um skúlan. Tað er ein frásøgn, sum onnur, ið ikki ganga í skúla, skulu skilja. So kanna vit trivnaðin í flokkinum. Hvussu er samanhaldið í flokkinum? Nær er stuttligast at vera í einum flokki? Gongur tú til frítíðartiltøk? Tak eina mynd og skriva reportasju um tína frítíð, og hvussu nógva tíð tú brúkar til frítíðartiltøk. Hvat fært tú burturúr? Kanst tú hugsa tær ein gerandisdag uttan frítíðartiltøk?

  • Útferð

    Uppgávan er at lýsa ein dag saman við floksfeløgum á útferð og teimum fólkum, sum tú annars møtir henda sama dag. Tú byrjar við at taka mynd av morgunmatinum heima, og siga frá, hvat tú vanliga etur til morgunmat. Lýs síðan, hvussu tit møtast í flokkinum og í felag fara avstað, og hvat tit uppliva á staðnum, sum tit fara til. Hvør er ferðaleiðari og hvussu er ferðin fyrireikað? Hvørjum møta tit, og hvat hoyra tit um henda dagin? Hvussu koma tit heim aftur? Tak so nógvar myndir, sum tú vilt. Ger eitt úrval, so lesarin fær eina fatan av, hvussu dagurin gekst.

  • Tema

    Uppgávan er at lýsa evnið dálking á blogginum. Her er umráðandi fyrst at tosa um evnið í flokkinum, hoyra hvat lærarin sigur, og so kanna evnið á netinum og á bókasavninum. Vit fara oman í fjøruna at vita, um vit finna burturkast, sum er vandamikið. Takið myndir. Hvar stavar burturkastið frá? Er nakað søguligt ruskpláss í nánd? Hvussu sleppa vit av við rusk í dag? Komin aftur í stovuna kjakast vit, um tað ber til, at sleppa heilt undan øllum ruski og burturkasti. Setið tykkum í samband við Umhvørvisstovuna, at hoyra um eina norðurlendska verkætlan, sum tey eru við í, har ætlanin er at sleppa heilt undan ruski. Tástanni kann bloggurin skrivast. Hetta kalla vit research, at kanna málið, innan skrivað verður. Brúkið myndirnar, sum tit sjálvi hava tikið.

  • Ummæli

    Uppgávan er at skriva ein blogg, sum er eitt persónligt ummæli av onkrum nýggjum, sum tær dámar, og sum tú vilt viðmæla øðrum at uppliva. Tað kann vera ein bók, eitt telduspæl, eitt borðspæl, tónleikur, filmur ella okkurt annað, sum tú persónliga hevur upplivað fyri stuttum, ella fert til beint nú. Tú velur sjálv, hvat tú ummælir. Tú skalt verða hugað fyri tí, sum tú velur at skriva um. Tú ert ein bloggmissiónerur. Men ansa eftir markinum, sum er millum at rósa og skammrósa. Tú hevur avgerandi orðið, og tað sum tú skrivar ger mun.

  • Seturskúli

    Uppgávan er at skriva ein egnan blogg við einari mynd eftir nátturða hvørt kvøld, meðan vit eru á seturskúla. Skriva í bloggin, sum var tað ein dagbók. Minst til, at øll síggja bloggin á netinum, um tú hevur valt ein opnan blogg. Er munur á at skriva privat og alment um sama evni? Kjakist í felag um Facebook og selfies. Kunnu allar myndir koyrast á Facebook, og kann allur tekstur skrivast í ein almennan blogg? Semjist um mørk fyri, nær vit kunnu brúka myndir av floksfeløgum á netinum, og nær tað ikki er so heppið. Eru vit øll samd um hesi mørk? Kannið eftir, hvørjar reglur eru galdandi fyri góða atferð á netinum.

  • Verkætlan

    Sjeyndi og seinasti bloggur í skúlaárinum knýtur seg at verkætlan, har vanliga logbókin nú verður til eina bloggbók. Verkætlanin verður løgd fram við einum bloggi, har tekstur, foto, ljóð og ella filmur verða brúkt.

Bloggur: Í orðabókini stendur, at bloggur er kallkynsorð, sum í fleirtali eitur bloggar. Bloggur er eitt slag av heimasíðu, har ið einstaklingar regluliga skriva viðmerkingar, greiða frá upplivingum og so framvegis, ofta av persónligum slag. Vit siga, at tey blogga. Ein bloggur er eisini eitt íkast ella viðmerking á einum bloggi: hon skrivaði ein blogg um mentan og samleika.

Tá bloggurnar bloggaðu: Fyrsta, vit vita um orðið blogg á føroyskum, er í Dimmalætting á pappíri í 2006. ‘Bloggurnar’, sum eru kvinnur, spæla uppá at tær eru blondinur. Mátin at skriva, verður kallaður at blogga. Tær skriva frekt og beint fram. Tær blogga á pappíri - tær skriva ágangandi, serliga um evni, sum eingin annar miðil tekur upp. Skriftliga framsetingin kann verða essay, ritroynd, sum altíð er persónlig og bundin av, at tú hevur nakað uppá hjartað, sum tú vilt deila við onnur her og nú. Umráðandi er, at lesarin veit, hvør tú ert. Tí eru mynd og navn altíð knýtt at einum bloggi. Seinni hevur týdningurin flutt seg frá pappíri og stíli, til at verða talgildur tekstur, sum bara er á netinum.

KT í skúlanum S-A-M-R

Skúlablaðið 5/2015 er burturav um skúlan í netverks-samfelagnum. Í samrøðu við Magna á Lakjuni, undirvísingarleiðara á Tekniska skúla í Havn, verður tosað um SAMR myndilin:

"Námsfrøðiliga hugsanin um KT tekur støði í SAMR myndlinum hjá Ruben Puentedura. Bókstavirnar standa fyri verandi KT-støði, og hvussu tað kann verða hækkað í undirvísingini og fáa næmingin við í læringina, sambært Blooms taksonomi. Myndilin byggir á 4 stig, har lærarin kann fara upp eftir stiganum, og skapa eina spennandi og mennandi frálæru."

Les alla samrøðuna her.

 

 

 

Bloggskipanir

Í FirstClass skipanini ber til at blogga innanhýsis í flokkinum ella í skúlanum, so onnur ikki síggja. Eisini ber til at mikroblogga, har tú kanst skriva status, stuttboð og senda myndir í skúlaskipanini, uttan at onnur síggja.

Er elsta og størsta nettænasta, sum bjóðar tær at gera ein almennan blogg fyri einki. Tú skalt bara hava eina Gmail kontu og uppskot um eitt navn, sum eingin annar hevur. Tú kanst velja ymsar litir og snið, sum eru gjørd frammanundan. Tú kanst gera 100 ymsar bloggar í hesi skipan. Google eigur Blogger. 

Er ein open source netskipan og bloggskipan við nógvum møguleikum, um tú hevur hug og hegni at forrita. 60 mió Wordpress bloggar eru á netinum. 

Er ein sosialur miðil og ein mikrobloggskipan, har tú kanst skriva tekst, senda myndir, video, slóðir, sitat og ljóð á tín egna tumbleblogg. Tú kanst gera bloggin almennan, ella privatan. 250 mió bloggarar brúka Tumbler. Helvtin av teimum eru yngri enn 25 ár. Yahoo! eigur Tumblr

Einasta tær tørvar, er ein Googlekonta, sum er ókeypis at stovna, og eitt navn til bloggin. Eftirnavnið verður blogspot.com. Fylg við hesum YouTube filmi, sum sigur, hvussu tú kanst gera tín egna almenna blogg fyri einki:

At skriva, lærir tú bara við at skriva.
...og so skalt tú lesa meiri, enn tú skrivar!

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017