Nýggja heimsatlasið er nú komið so væl áleiðis, at vit í Námi hava samlaða kortavalið til atlasið. Nøkur av kortunum eru á tekniborðinum í løtuni og væntast liðug í vár. Men vit hava samlaða navnatilfarið til atlasið í fyribils umseting, ið fer til viðgerðar hjá fakfólki og í málnevndini.

Vit vilja við hjálagda navnalista eisini geva almenninginum høvi at koma við viðmerkingum, ið vit vóna kunnu vera við til at gera nýggja heimsatlasið enn betur.

Nám vil taka allar viðmerkingar frá almenninginum við í endaligu niðurstøðuna av navnatilfarinum saman við viðgerðini frá serfrøðingunum og málnevndini.
Viðheft síggjast í bókstavarað øll tey staðarnøvn í Føroyum og úti í heimi umleið 22.000 í tali, sum verða leitorð í nýggja heimsatlasinum hjá Námi.

20.000 av hesum eru staðarnøvn úti í heimi og 2000 eru á landi og sjógvi í og kring Føroyar.

Av staðarnøvnunum úti í heimi eru túsund umsett. Tey síggjast á kortunum og í leitorðalistanum aftast í atlasinum. Í leitorðalistanum verða umsettu staðarnøvnini ofta víst við ymsum stavihættum, so øll, ið brúka atlasið, hava besta møguleika at finna støð, uttan mun til um tey brúka føroyska stavseting ella tey brúka útlendska stavseting.

Tá ið ræður um tey túsund umsettu nøvnini hevur reglan verið, at bara landanøvn verða umsett. Í øðrum lagi verða eisini landafrøðilig fyribrigdi, ið fara um landamark, umsett. Aftast í atlasinum er ein landafrøðilig alfrøði.

Heimsatlasið, ið fær heitið Heimurin – Atlas til skúla og almenning  verður gjørt í samstarvi við undirvísingardeildina hjá forlagnum Harper Collins og ætlast at vera liðugt í mai í 2013. Atlasið fær harða permu, og síðutalið er 248. Forlagið Harper Collins er fremsti framleiðari av kortum, ið verða nýtt í atlasum um allan heim. Føroyska útgávan byggir á Collins Student World Atlas. Málbólkurin er næmingar úr 9. flokki upp í miðnám. Øll, ið hava onkra viðmerking til tey staðarnøvn, ið her eru at síggja, kunnu skriva til atlas@nam.fo og greiða frá.

Navnalisti - allur heimurin

Navnalisti - Føroyar