• Yvirlit
  • Prenta
  • RSS hald
Tú ert her:

Nýggjársrøða løgmans gamlaárskvøld 2016

(90 min. 8.-10. flokkur)

 

Førleikamál

  • At skilja, hvørji mál løgmaður, tað er samgongan, heldur hava størstan týdning í tíðini, sum kemur
  • At duga á at skyna, hvussu politiskar røður kunnu verða brúktar at fremja boðskapin hjá einum ávísum flokki
  • At megna at greina partar av einari røðu og at kanna háttalagið, ið brúkt verður

  

Søga

Vanligt er, at gamlaárskvøld heldur løgmaður nýggjársrøðu. Alt síðan útvarp og seinni sjónvarp varð uppfunnið og tikið í brúk, hevur verið vanligt, at ríkisleiðarar tala til fólkið. Eisini drotningin heldur nýggjársrøðu. 

Fólk eru spent at hoyra, hvat løgmaður hevur at siga, og hvussu hann fer at miðla sín politiska boðskap.

Nýggjársrøðan verður send í sjónvarpinum, og dagin eftir skipar útvarpið og sjónvarpið fyri, at aðrir føroyskir politikarar, vanliga floksformenn, sleppa at gera sínar viðmerkingar.

Men hvat halda tit um røðuna?

 

Vit fara til verka

 Farið saman í bólkar - fýra og fýra

  • Tosið saman. Var røðan, sum tit væntaðu? Hyggið at stikkorðunum
  • Gerið serfrøðingabólkar
  • Viðgerið hvør sítt evni, 1 – 4

  

Vit spyrja

  • Hvat er evnið, tit viðgera?
  • Hvussu viðger løgmaður henda partin? Eftirmetir hann 2016? Sigur hann, hvørjar ætlanirnar eru fyri 2017? Ella ger hann okkurt heilt annað?
  • Hevur løgmaður ein boðskap? Um so er, hvør er boðskapurin?
  • Hvussu miðlar løgmaður boðskapin? Tosar hann til lurtarans álit, skil ella kenslur?
  • Eru tit samd við løgmanni um henda partin av røðuni?
  • Er tað lætt at síggja, hvørjum politiskum flokki løgmaður er partur av? Nevn dømi, um tit halda at so er.

Farið aftur til høvuðsbólkarnar og greiðið frá.

Eftirmeting - allur flokkurin

  • greiðið stutt frá niðurstøðunum í bólkunum
  • tosið um, hvørt røðan livir upp til tað, sum tit í byrjanini hildu var ein góð nýggjársrøða

 

Annað tilfar

  • The King’s Speech (2010), biograffilmur um George VI kong, og hvussu hann lærdi seg at halda talur, hóast hann var tungur fyri málinum.
  • The Crown (2016), nýggj sjónvarpsrøð á Netflix um Elizabeth II drotning frá 1947 upp til okkara dagar, væntandi í 60 pørtum.

Vit gera eitt serfrøðingaráð

Hesin arbeiðsháttur er góður, tá ið eitt evnið skal verða lýst á ymiskan hátt, ella tá ið evnið setur ymiskar spurningar, og tíðin er knøpp. Við at nýta henda arbeiðsháttin, fáa øll vitan um umrøddu evnini - og tað gongur skjótari. Samstundis fáa tit venjing í at arbeiða í bólkum.

 

Soleiðis gera tit:

  1. Finnið saman fýra og fýra
  2. Hvør limur í bólkinum fær eitt tal frá 1 til 4
  3. Eittararnir úr øllum bólkunum fara saman og gera ein nýggjan bólk. Tveyararnir fara saman við hinum tveyarunum o.s.fr.
  4. Í tí nýggja serfrøðingaráðnum arbeiða tit við einum givnum evni/øki, og tit gerast serfrøðingar í hesum evni/øki.
  5. Tá ið arbeiðið í serfrøðingabólkinum er liðugt, fara tit aftur til upprunaliga høvuðsbólkin.
  6. Nú greiða tit frá í skrift, ella talu, um evnini/økini, sum tit eru serfrøðingar í.

 

Viðgerið røðuna

  • Tosið saman um nýggjársrøður yvirhøvur. Hvat halda tit ger eina nýggjársrøðu góða ella minni góða? Skriva stikkorð á talvuna
  • Hyggið og lurtið eftir nýggjastu nýggjársrøðuni hjá løgmanni
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2018