• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Ælabogasíl (laksaættin) 
Oncorhynchus mykiss (Walbaum, 1792)

Stødd: Í Evropa verða tey upp í umleið 80 cm long, men í upprunalondunum kunnu tey verða upp í 120 cm.

Dýpi: Úr vatnskorpuni niður á minst 40 metra dýpi í djúpum vøtnum.

Litur: Hetta sílaslagið er dimt um bakið, ljóst, blankt um síðurnar og hvítligt undir búkinum. Nógvar smáar, dimmar blettir um kroppin, høvdið, stertin og ryggfjøðurina. Eitt ljóst reydligt band er eftir síðunum. Tey, sum liva í sjónum, á enskum nevnd ‘steelheads’, eru blonk sum sjósíl, men reydligi liturin um síðurnar sæst tó væl.

Lýsing: Líkist øðrum laksafiskum. Lítið høvd, stóran stert, eina ryggfjøður, eina fitifjøður, eina gotfjøður. Búkfjaðrarnar eru umleið mitt undir ryggfjøðurini. Uggafjaðrarnar eru niðarlaga fremst á ugganum. Mest sum beina striku aftur eftir síðunum.

Eyðkenni: Reyðvióllitt band eftir síðunum. Nógvu dimmu blettirnir á høvdinum, kroppinum, ryggfjøðurini og á stertinum.

Týdningur: Í Føroyum og Evropa annars hevur ælabogasílið stóran týdning í alivinnuni.

da: Regnbueørred, en: Rainbowtrout – Steelhead, fr: Truite arc-en-ciel, ís: Regnbogasilungur, no: Regnbueørret, tý: Regenbogenforelle

Útbreiðsla: Eins og síl, so er ælabogasílið í áum, vøtnum og í sjónum. Upprunaliga hoyrir ælabogasílið heima í norðara parti av Kyrrahavinum, men tað er serliga vælegnað til aling og er tí nú á døgum mest sum um allan heimin. Tað verður alið, og eisini verða tey sett út í ymisk vøtn til frítíðarfiskarar, ella tey sleppa úr alibrúkunum. Ælabogasíl gýtir ikki natúrliga í Føroyum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Laksafiskar Salmoniformes

Laksafiskahópurin hevur eina ætt við 11 slektum og 66 sløgum:

  • Laksaættin (Salmonidae)

Í Føroyum eru 3 slektir og 5 sløg, harav tann eina ættin við tveimum sløgum, er ikki upprunalig í Føroyum, men er komin úr alibrúkum her og aðrastaðir.

 Langvaksnir og smidligir fiskar. Teir hava eina ryggfjøður, eina gotfjøður og eina fitifjøður.

Øll sløgini gýta í feskum vatni, men nøkur teirra vaksa upp í sjónum. Hesi seinnu eru anadrom.

Hjá havgangandi fiskum er liturin bládimmur um bakið, og síðurnar eru blankar við dimmum blettum. Fiskur í feskvatni er oftast brúnligur ella gulgráur við blettum, men í stórum vøtnum eisini littir sum teir í sjónum, tó kámari.

Fiskurin í laksafiskum er, við onkrum undantøkum, reydligur.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017