• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Blálonga (toskaættin)
Molva dypterygia (Pennant, 1784)

Stødd: Blálonga verður upp í 155 cm long.

Dýpi: Hon er úr 130 m niður á 1500 m dýpi, vanligast úr 300 m niður á 800 m.

Litur: Hon er myrk, brún-grá um bakið. Undir búkinum er hon ljósablágrá. Allur fiskurin hevur ein bláligan farra og skyggir eitt sindur í bronsuliti. Ofta nakað sprøklut um síðurnar. Sterturin, búkfjaðrarnar og ryggfjaðrarnar hava svarta rond, sjálvur fjaðrajaðarin er bleikljósur.

Teinar: R1 12-14; R2 72-84; G 70-76.

Lýsing: Blálonga er langur, smidligur fiskur. Hon hevur tvær ryggfjaðrar, tann fremra er stutt og eitt sindur hægri enn tann aftara. Tann aftara er long og røkkur aftur til klingruna. Gotfjøðurin er frá gotinum aftur í klingruna. Høvdið er langt og mjátt. Hon hevur undirbit. Finnan er styttri enn eygnatvørmátið. Hon hevur stór eygu, stóran Toskafiskar Toskaættin kjaft við stórum, hvøssum tonnum. Sterturin bogar nakað aftureftir.

Eyðkenni: Serliga kløn um klingruna. Tann bláligi farrin. Svarta rondin um stertin.

Týdning: Blálonga verður nógv veidd og er virðismikil fiskur.

da: Blålange - Byrkelange, en: Blue ling, fr: Lingue bleue, ís: Blálanga, no: Blålange, tý: Blauer Leng

Útbreiðsla: Blálonga er frá Finnmørkini og Svalbarði til Íslands, Grønlands og Nýfundlands. Undir Føroyum, í norðara Norðsjónum og Skagerrak. Hon er á Rockallbanka og Hattonbanka, vestan fyri Írland til Marokko og inn í Miðjarðarhavið. Mest er til av henni vestan fyri Írland og Føroyar.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017