• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Brynjukrutt (brynjukruttaættin)
Agonus cataphractus (Linné, 1758)

Stødd: Brynjukrutt verður upp í 21 cm langt, men er vanliga millum 8 og 15 cm.

Dýpi: Vanligast er tað úr 5 metra dýpi niður á 270 metra dýpi. Brynjukrutt er tó eisini fingið úti á 500 metra dýpi.

Litur: Tað er grábrúnt um bakið við 4-5 dimmari kámum blettum. Tað er ljósari undir búkinum, viðhvørt við gráligum blettum. Fjaðrarnar eru gulligar við dimmum blettum ella strikum.

Teinar: R IV-VI; R2 6-8.

Lýsing: Brynjukrutt er langur og klænur fiskur. Um uggarnar er tað væl breiðari enn høgt, og høvuðbreiddin er næstan 1/4 av heildarlongdini. Høvdið framman er kantut og píkut, tveir krókar eru fremst á yvirkjaftinum. Tað er sera klænvaksið frá gotinum og aftureftir. Brynjukrutt er sett við hørðum, kantutum beinplátum. Tað er stívt og hart at føla. Brynjukrutt hevur tvær ryggfjaðrar, báðar umleið líka smáar. Lítið, næstan einki glopp er millum ryggfjaðrarnar. Skeggtræðrir eru á undirkjaftinum.

Eyðkenni: Teir báðir krókarnir fremst á fiskinum. Líkist mest íshavsbrynjukrutti. Munur teirra millum er m.a., at brynjukrutt er breiðari um høvdið og er breiðvaksnari, ryggfjaðrarnar eru næstan áfastar, og at ongir píkar eru á nakkanum.

Týdningur: Brynjukrutt hevur ikki vinnuligan týdning.

da: Panserulk, en: Armed bullhead - Pogge, fr: Asphidophore armé, ís: Broddamús, no: Panserulke, tý: Steinpicker

Útbreiðsla: Brynjukrutt fæst mest sum allastaðni undir Føroyum, inni á firðum, í sundum og úti á landgrunninum, men er ikki fingið á Føroyabanka. Tað er fingið á Suðurlandinum og Vesturlandinum í Íslandi, kring Bretsku Oyggjarnar, í Norðsjónum og nakað inn í Eystarasalt, fram við Noregi norður í Hvítahavið.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Sporðdrekafiskar Scorpaeniformes

Í sporðdrekahópinum eru 26 ættir, ið hava 279 slektir og 1477 sløg.

Av hesum eru undir Føroyum 7 ættir við 17 slektum og 23 sløgum:

  • Kongafiskaættin (Scorpaenidae)
  • Knurrhanaættin (Triglidae)
  • Ulkuættin (Cottidae)
  • Brynjukruttaættin (Agonidae)
  • Huldukruttaættin (Psychrolutidae)
  • Rognkelsisættin (Cyclopteridae)
  • Súgfiskaættin (Liparidae)

Fiskarnir í hesum hópinum eru í stødd smáir til miðal, sterturin er oftast nakað rundaður aftureftir, onkuntíð innbogin, men sjáldan sýldur. Uggafjaðrarnar eru oftast avrundaðar aftan.

Fiskarnir eru oftast klæddir við píkum ella beinplátum um høvd og bul, yvirhøvur hvassir, harðir og knortlutir fiskar.

Sporðdrekafiskar eru um øll høv, onkur sløg eru í blandingsvatni og onkur eisini í feskvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017