• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Edlafiskur (edlafiskaættin)
Bathysaurus ferox Günther, 1878

Stødd: Edlafiskur verður upp í 67 cm langur, vanliga er hann um 55 cm.

Dýpi: Hann er botnfiskur á dýpum úr 600 m niður á 3500 m ella enn djúpari.

Litur: Hann er gráligur, grásvartur.

Teinar: R 17-18; G 11-13; U 15; B 8.

Lýsing: Edlafiskur er mjávaksin fiskur, høvdið er flatt, og gronin minnir um krokodillunev. Eyguni eru smá og sita út móti hvørji lið á skøltinum. Fremri rundingur á eyganum situr yvir miðjuni á kjaftinum. Hann er roðslusettur líka úr klingruni fram móti eygunum. Hann hevur næstan beina striku frá kápuklovinum aftur í klingruna. Uggafjaðrarnar eru langar, og mittasti teinur er sjónliga longstur. Ryggfjøðurfestið er langt, um tvær ferðir gotfjøðurfestið. Ryggfjøðurin er umleið líka høg sum bulurin og byrjar beint yvir búkfjaðrunum. Hann hevur eina gotfjøður. Miðalstóran, eitt sindur sýldan stert. Stóran kjaft við nógvum hvøssum tonnum.

Eyðkenni: ’Krokodillunevið’, nógvu og hvøssu tenninar og langi teinurin mitt í uggafjaðrunum.

Týdningur: Edlafiskur hevur ikki vinnuligan týdning.

da: Dybhavsøglefisk, en: Deepsea lizardfish, ís: Vargakjaftur

Útbreiðsla: Hann er undir Íslandi og úr Davisfirði til Suðurafrika og Brasil. Í Indiahavinum og Kyrrahavinum. Hann er fingin vestur av Føroyabanka á umleið 700 metra dýpi, út av Lúsabanka á 1800 m dýpi, út av Bankarygginum á 730 metra dýpi, og á Íslandsrygginum á 500-700 m dýpi.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Langkjaftafiskar Aulopiformes

Hesin hópurin hevur 15 ættir, 44 slektir og umleið 236 sløg.

Av teimum eru undir Føroyum 4 ættir við 6 slektum og 6 sløgum:

  • Mjáfiskaættin (Notosudidae)
  • Háfjaðraættin (Alepisauridae)
  • Lakstobisættin (Paralepididae)
  • Edlafiskaættin (Bathysauridae)

Ymiskir í stødd, frá heilt smáum upp til heilt langar fiskar.

Mjáir og smidligir fiskar við longum høvdi og kjafti, summi sløg við stórum hvøssum tonnum og høgum, longum fjaðrum. Skapið á táknabogunum er serligt, minnir um rimaverk. Nøkur sløg í hesum hópinum liva við botnin, onnur uppi í sjónum.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017