• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Ennifiskur (ennifiskaættin)
Platyberyx opalescens Zugmeyer, 1911

Stødd: Longdin á ennifiski verður upp í 60 cm, mátað til klingruna.

Dýpi: Hann er mest uppsjóvarfiskur, úr vatnskorpuni niður á 3660 metrar.

Ein er veiddur í botntroli vestur úr Mykinesi á umleið 475 metra dýpi.

Litur: Hann er brúnligur við kámum opalskyggjandi liti. Kápan er dimmblá-vióllitt. Sterturin er glærur. Ryggfjøðurin, gotfjøðurin, og búkfjaðrarnar eru svartar.

Teinar: R 28-31; G 17-19.

Lýsing: Ennifiskur hevur flatkroysta útsjónd, høgur og smalur. Standardlongdin er um tvær reisir hæddina. Hann hevur eina sera høga ryggfjøður, fremst av nakkanum aftur í klingruna. Ennifiskur hevur eina gotfjøður, ið er frá mitt undir ryggfjøðurini aftur í klingruna. Hann hevur langar búkfjaðrar, ið sita fremst og niðast á búkinum og røkka væl aftur á gotfjaðrafestið.

Uggafjaðrarnar eru nakað langar, røkka væl aftur á gotfjaðrafestið.

Høvdið er eins høgt og kroppurin, nógv upprent framman, ennið er høgt. Eyguni eru frammarlaga og miðskeiðis á høvdinum, rættiliga stór. Kjafturin er nakað stórur, eitt sindur upprendur og er niðast og fremst á høvdinum. Hann kemur aftur undir aftaru trom á eygunum. Ennifiskur hevur smáar tenn.

Strikan er bogin uppeftir og gongur javnt undir ryggfjøðurini. Hann hevur tveir nasagluggar hvørjumegin.

Eyðkenni: Høga ennið, longu fjaðrarnar.

Týdningur: Hann hevur ikki vinnuligan týdning.

ís: Ennisfiskur

Útbreiðsla: Ennifiskur er undir Føroyum. Í Atlantshavinum annars frá 65°N til 40°N. Ennifiskur er sjáldsamur fiskur.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017