• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Gúnters langasporl (langasporlsættin) 
Coryphaenoides guentheri
(Vaillant, 1888)

Stødd: Tað verður í minsta lagi 50 cm langt.

Dýpi: Tað er úr 830 m niður á 2830 m.

Litur: Tað er brúnligt. Inni í kjaftinum og inni í táknaholunum er tað dimmari.

Teinar: R1 11-12; U 19-21; B 7-8.

Lýsing: Gúnters langasporl hevur stutt og nakað kubbut høvd og langt sporl, sum mjækkar aftur í sporlsendan. Tjúkkast er tað um uggafjaðrarnar. Tað hevur tvær ryggfjaðrar. Fremra er høg og stutt, stendur fremst á bakinum og er smátent framman. Aftara ryggfjøður hevur sera lágar teinar og er væl leys frá teirri fremru. Hon endar aftast á sporlinum, har hon rennur saman við gotfjøðurina í ein spíss. Tað hevur ikki stert. Uggafjaðrarnar eru heldur fremri enn fremra ryggfjøðurin. Búkfjaðrarnar eru eitt vet aftari.

Gúnters langasporl hevur harðan, spískan trant, við hørðum, tindutum roðslum oman fyri hvassa kantin eftir kjálkunum. Eingin roðsla er undir høvdinum. Tað hevur lítla finnu, upp í hálvt eygnatvørmát. Tað hevur lítlan kjaft, kjaftklovin kemur ikki aftur mitt undir eygað. Tað hevur stór eygu.

Eyðkenni: Tað er smátent framman á fremru ryggfjøður, sera langa sporlið, mjáa skapið og stutta gronin.

Týdningur: Gúnters langasporl hevur ikki vinnuligan týdning.

da: Günther’s skolæst, en: Günther’s grenadier, ís: Ingólfshali

Útbreiðsla: Í Davisfirði og sunnan fyri ryggirnar Grønland- Skotland suður til Kanariuoyggjarnar. Tað er eisini í Miðjarðarhavinum. Undir Føroyum er tað út av bankunum vestanfyri.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017