• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Havnebbasild (nebbasildaættin)
Ammodytes marinus Raitt, 1934

Stødd: Havnebbasild verður upp í umleið 25 cm long.

Dýpi: Hon er út á umleið 150 m dýpi.

Litur: Havnebbasild er grønblá um bakið, blá um síðurnar og silvurhvít undir búkinum. Á høvdinum er skarpt mark millum tað myrka ovari og tað ljósa niðari.

Teinar: R 56-63; G 29-33.

Lýsing: Havnebbasild hevur langan og klænan kropp, langt og spískt høvd, rundligan tvørskurð. Hon hevur eina langa ryggfjøður, ið byrjar frammarlaga á bakinum og kemur næstan aftur í klingruna. Hon hevur eina gotfjøður, ið er helvtina so long sum ryggfjøðurin og gongur líka langt aftur. Endin á uggafjøðurini kemur aftur undir fremra enda á ryggfjøðurini. Roðsla er um allan kroppin. Havnebbasild verður greind frá lítlu nebbasild m.a. á tí, at roðslan undir búkinum er fløkjaliga sett, ikki í beinum røðum, og at hon kemur ikki aftur á stertarótina. Sterturin er sýldur. Hon hevur ikki búkfjaðrar. Yvirkjafturin kann skjótast fram. Hon hevur ikki spískar tenn í gómanum.

Eyðkenni: Hon hevur ikki svartan blett við nasagluggarnar. Uggafjøðurlongd. Roðslan er ikki aftur á stertin og er óregluliga sett undir búkinum.

Týdningur: Í Føroyum hevur hon ikki havt vinnuligan týdning, men aðrastaðni verður hon nógv veidd.

da: Havtobis, en, Lesser sandeel – Launce, fr: Lançon equille, ís: Marsíli, no: Havsil, tý: Kleiner Sandaal - Tobis

Útbreiðsla: Undir Føroyum er hon á landgrunninum og á Føroyabanka. Hon er runt Bretsku Oyggjarnar, frá Bretagne, norður til Novaja Semlja og Bjarnoynna. Hon er undir Íslandi og Grønlandi, í Norðsjónum og í vestara parti av Eystarasalti.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017