• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Høvuðlítli angarfiskur (angaættin)
Searsia koefoedi Parr, 1937

Stødd: Høvuðlítli angarfiskur verður upp í 15 cm langur.

Dýpi: Hann er úr 450 m niður á 1500 m.

Litur: Hann er javnt dimmur, morsvartur.

Lýsing: Kropshæddin á høvuðlítla angarfiski er um tvær ferðir breiddina. Hann hevur lítið høvd, um 25% av standardlongdini. Hann hevur stór eygu, sum sita frammarlaga, lítlan kjaft, ið kemur aftur undir hálvt eygað, og stutta gron. Uggafjaðrarnar og búkfjaðrarnar eru smáar. Hann hevur eina ryggfjøður, ið er eins stór og gotfjøðurin. Hesar báðar fjaðrarnar sita aftanvert miðjan kroppin, gotfjøðurin er eitt vet aftari. Hann hevur sýldan stert. 4 ljósgøgn eru hvørjumegin ‘kjølin’, frá búkinum til afturkantin á gotfjøðurini. Aftast undir klingruni eru eisini tvey ljósgøgn. Ein lítil angi er beint oman fyri hvørja uggafjøður.

Eyðkenni: Fiskastøddin og ljósgøgnini, kjaftbeinið, høvuðstøddin og lítli angin.

Týdningur: Hann hevur ikki vinnuligan týdning.

da: Koefoeds skulderlysfisk, en: Koefoeds searsid, ís: Ægisangi, tý: Silberbeil

Útbreiðsla: Hann er á leiðunum úr Eysturgrønlandi, sunnan fyri ryggirnar Grønland/ Skotland, til Marokko og Guineavíkina. Hann er í Davisfirði, í Vesturatlantshavinum, í Kyrrahavinum og Indiahavinum í flógvum sjógvi. Hann er út av Ytrabanka og Lúsabanka.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Glitfiskar Argentiniformes

Hesin hópurin hevur 6 ættir, 57 slektir og 202 sløg.

Av teimum eru við Føroyar 4 ættir, ið hava 9 slektir og 12 sløg:

  • Gulllaksaættin (Argentinidae)
  • Blálaksaættin (Microstomatidae)
  • Angaættin (Platytroctidae)
  • Glámaættin (Alepocephalidae)

Fiskasløgini í hesum hópinum eru tey flestu smá, onkur stór inn ímillum, summi nakað bulmikil og onnur long og kløn. Flestu hava stutta gron og lítlan kjaft. Nøkur hava fitifjøður, onnur ikki.

Litirnir á glitfiskunum eru mest blankir, silvurlittir, gulllittir, brúnir ella svartir. Nakrir hava ljósgøgn. Ein ávísur súrligur luktur gongur at flestum teirra.

Nakrir eru lutvíst í feskum vatni, annars um øll høv.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017