• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Huldukrutt (huldukruttaættin)
Cottunculus thomsonii (Günther, 1882)

Stødd: Huldukrutt verður upp í 45 cm langt.

Dýpi: Tað er úr 100 metrum niður á 1600 metra dýpi.

Litur: Tað er grábrúnligt.

Litirnir eru kámir. Fjaðrarnar eru ofta heldur dimmari enn kroppurin.

Teinar: R VI + 14-17; G 13; U 18.

Lýsing: Huldukrutt er høvuðstórur fiskur, høvdið er um 30% av heildarlongdini. Hægst er huldukrutt fremst á bulinum, mjækkar aftureftir, og klingran er kløn. Tað hevur stór eygu ovarlaga í heysinum, lítlan kjaft, og kjaftklovin er týðiliga frammanvert eyguni. Huldukrutt hevur slætta skræðu og er roðsluleyst. Ein-tveir naddar eru við eyguni og tveir á nakkanum. Tað hevur eina ryggfjøður, av nakkanum aftur í klingruna og eina gotfjøður, frá gotinum aftur í klingruna, báðar eru lágar framman og hægri aftan. Huldukrutt hevur stórar uggafjaðrar, sum røkka umleið aftur á hálvan fiskin, smáar búkfjaðrar og stóran, mjáan stert.

Eyðkenni: Kámi liturin. Stóra høvdið. Ulkuskapið, fáu píkarnir og slætta skræðan.

Týdningur: Huldukrutt hevur ikki vinnuligan týdning.

en: Pallid sculpin, fr: Cotte blême, ís: Tómasarhnýtill  

Útbreiðsla: Huldukrutt fæst av og á eystan fyri, sunnan fyri og vestan fyri Føroyar. Annars er tað í hellingunum frá Útnyrðingsafrika, fram við Evropa, um Føroyar og Ísland til Eysturgrønlands og Vesturgrønlands. Tað er eisini við eysturstrond Norðuramerika, frá North Carolina til Labrador.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Sporðdrekafiskar Scorpaeniformes

Í sporðdrekahópinum eru 26 ættir, ið hava 279 slektir og 1477 sløg.

Av hesum eru undir Føroyum 7 ættir við 17 slektum og 23 sløgum:

  • Kongafiskaættin (Scorpaenidae)
  • Knurrhanaættin (Triglidae)
  • Ulkuættin (Cottidae)
  • Brynjukruttaættin (Agonidae)
  • Huldukruttaættin (Psychrolutidae)
  • Rognkelsisættin (Cyclopteridae)
  • Súgfiskaættin (Liparidae)

Fiskarnir í hesum hópinum eru í stødd smáir til miðal, sterturin er oftast nakað rundaður aftureftir, onkuntíð innbogin, men sjáldan sýldur. Uggafjaðrarnar eru oftast avrundaðar aftan.

Fiskarnir eru oftast klæddir við píkum ella beinplátum um høvd og bul, yvirhøvur hvassir, harðir og knortlutir fiskar.

Sporðdrekafiskar eru um øll høv, onkur sløg eru í blandingsvatni og onkur eisini í feskvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017