• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Hýsa (toskaættin)
Melanogrammus aeglefinus
(Linné, 1758)

Stødd: Hýsa verður upp í umleið 112 cm long.

Dýpi: Hýsa er mest við botnin, men er eisini vanlig uppi í sjónum. Vanliga dýpið er millum 10-300 m, men er eisini fingin niðri á 450 m.

Litur: Hon er dimm um bakið, grá ella blágrøn. Hon er ljós um síðurnar, ofta silvurblonk, og undir búkinum er hon hvít, gráhvít. Hon hevur ein dimman blett á síðunum oman fyri uggafjaðrarnar. Summar hýsur hava smáar, gráar blettir ovarlaga á síðunum.

Teinar: R1 15-16; R2 19-21; R3 19-23; G1 23-24; G2 22-23.

Lýsing: Hýsa hevur tríggjar ryggfjaðrar og tvær gotfjaðrar. Fremsta ryggfjøðurin er eitt sindur høg, stutt og spísk. Búkfjaðrarnar eru heldur smalar og sita fremri enn fremsta ryggfjøður. Uggafjaðrarnar sita eins frammarlaga og fremsta ryggfjøður, og tær røkka aftur til mittastu ryggfjøður. Sterturin er nakað innbogin. Strikan er svørt og er bogin oman fyri uggafjøðurina. Hon hevur lítlan kjaft, yvirbit og lítla finnu.

Eyðkenni: Tann dimmi bletturin beint oman fyri og aftan fyri uggafjøðurina. Nýveidd gongur ein lættur súrligur roykur at henni.

Týdningur: Hýsa er virðismikil fiskur og verður nógv veidd.

da: Kuller, en: Haddock, fr: Églefin, ís: Ýsa, no: Hyse, tý: Schellfisch

Sí myndir og videoklipp her.

Útbreiðsla: Hýsa er við Novaja Semlja, í Hvítahavinum og við Svalbarð suður í Kattegat og Norðsjógvin til Biskeiavíkina. Undir Føroyum og Íslandi. Frá Nýfundlandi til Cape Hatteras. Hýsa er sjáldsom í Grønlandi.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017