• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Íshavshornabrosma (hornabrosmuættin) 
Ciliata septentrionalis (Collett, 1875)

Stødd: Íshavshornabrosma verður helst ikki longri enn 20 cm.

Dýpi: Hon er úr 9 m niður á 90 metra dýpi, vanligast millum 30 og 90 metrar.

Litur: Hon er grábrún, ljósari undir búkinum. Viðhvørt er ein feril av reydligum um bakið. Kjaftholan er ljós.

Teinar: R1 1; R2 48-53; G 42-44;

Lýsing: Íshavshornabrosma er lítil fiskur, langvaksin og nakað tjúkk. Hon hevur tvey horn við nasagluggarnar og tvey smá horn beint oman fyri yvirkjaftin. Aftur frá hesum báðum smáu hornunum ganga tríggir smáir, breiðir skeggtræðrir hvørjumegin við. Hon hevur finnu á lippuni. Hon hevur tvær ryggfjaðrar, fremra er heilt lág, fremsti teinur er hægri enn hinir. Henda fjøður liggur niðri í eini foyru á bakinum. Aftara ryggfjøðurin er long og javnt høg, er frá um miðjari uggafjøður og aftur til klingruna. Uggafjaðrarnar eru førligar, avrundaðar aftan. Búkfjaðrarnar eru smalar, og næstfremsti teinurin eru væl longri enn hinir. Sterturin er rundaður aftan. Strikan ótýðilig og bogin omanfyri uggafjøðurina. Høvdið er langt, umleið 23-25% av heildarlongdini. Kjafturin er stórur og røkkur væl aftur um eyguni.

Eyðkenni: Hornini og skeggtræðrirnir. Hesin fiskurin verður møguliga ofta mistikin fyri aðrar hornabrosmur, kanska oftast hornabrosmu (C. mustela). Kjaftklovin kemur langt aftur um eyguni.

Týdning. Hon hevur ikki vinnuligan týdning.

da: Nordisk havkvabbe, en: Northern rockling, ís: Ljóskjafta, no: Nordisk tangbrosme, – Nordlig tangbrosme, tý: Nordische Seequabbe

Útbreiðsla: Íshavshornabrosma er sjáldsamur fiskur. Hon er fingin undir Føroyum. Er eisini fingin í Norðsjónum, við Bretsku Oyggjarnar, vestan fyri Írland, við Noreg frá Bergen til Hammerfest, á Suður- og Eysturlandinum í Íslandi. Møguliga eisini í Vesturgrønlandi.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017