• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Íshavssúgfiskur (súgfiskaættin)
Careproctus reinhardti (Krøyer, 1862)

Stødd: Íshavssúgfiskur verður upp í 30 cm langur.

Dýpi: Hann er úr 100 m niður á 2000 m.

Litur: Hann er gulur ella reyðgulur. Ein feril av bláligum liti er á ryggfjaðrunum og gotfjaðrunum.

Teinar. R 51-62; G 45-51.

Lýsing: Íshavssúgfiskur hevur kubbut skap, hann er tjúkkur framman, klænur aftan, bleytur, minnir um hvalspýggju. Hann hevur eina ryggfjøður av klingruni fram á nakkan, eina gotfjøður av klingruni heilt fram til gotið. Gotið er eitt eygnatvørmát frá súgvikoppinum. Hann hevur stórar uggafjaðrar, ovari partur sum vanligar fjaðrar, niðari meira trevsutur. Búkfjaðrarnar eru samanvaksnar í ein súgvikopp, sum situr undir búkinum og er til støddar sum eygað. Høvdið er stórt, og gronin er avkubbað, eyguni sita næstan fremst á høvdinum, tey eru miðalstór, og framman fyri eyguni eru tveir nasagluggar fram úr høvdinum. Stór slipuop eru á gronini oman fyri yvirkjaftin og á undirkjaftinum. Hann hevur smá táknaop og lítlan stert. Skræðan er tjúkk og tykist glærut.

Eyðkenni: Langa gotfjøðurin og langa ryggfjøðurin. Flata gronin. Tveir nasagluggar.

Týdningur: Íshavssúgfiskur hevur ikki vinnuligan týdning.

da: Spidshalet ringbug – Reinhardts ringbug, ís: Hveljusogfiskur, no: Nordlig ringbuk

E.S. Summi súgfiskasløg eru so lík, at ringt er at skilja tey hvørt frá øðrum. Um fiskin, Careproctus reinhardti, siga nøkur vísindafólk, at hann í veruleikanum er C. longipinnis, onnur, at hann er C. micropus. Í hesi bókini er hann so C. reinhardti.

Útbreiðsla: Íshavssúgfiskur er í køldum sjógvi frá Labrador til Massachussetts. Úr Eystur- og Vesturgrønlandi til Jan Mayen, Svalbarðs og í Laptevhavið. Hann er undir Íslandi, Føroyum og Noregi. Hann er í Hetlandsrennuni og í Skagerrak.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Sporðdrekafiskar Scorpaeniformes

Í sporðdrekahópinum eru 26 ættir, ið hava 279 slektir og 1477 sløg.

Av hesum eru undir Føroyum 7 ættir við 17 slektum og 23 sløgum:

  • Kongafiskaættin (Scorpaenidae)
  • Knurrhanaættin (Triglidae)
  • Ulkuættin (Cottidae)
  • Brynjukruttaættin (Agonidae)
  • Huldukruttaættin (Psychrolutidae)
  • Rognkelsisættin (Cyclopteridae)
  • Súgfiskaættin (Liparidae)

Fiskarnir í hesum hópinum eru í stødd smáir til miðal, sterturin er oftast nakað rundaður aftureftir, onkuntíð innbogin, men sjáldan sýldur. Uggafjaðrarnar eru oftast avrundaðar aftan.

Fiskarnir eru oftast klæddir við píkum ella beinplátum um høvd og bul, yvirhøvur hvassir, harðir og knortlutir fiskar.

Sporðdrekafiskar eru um øll høv, onkur sløg eru í blandingsvatni og onkur eisini í feskvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017