• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Kaldi úlvfiskur (úlvfiskaættin)
Lycodes frigidus Collett, 1878

Stødd: Kaldi úlvfiskur sigst at verða í mesta lagi 69 cm langur, vanliga 40-55 cm.

Dýpi: Hann er fingin á 475 metra dýpi, men vanliga er hann úr 900 metrum niður á 3000 metrar, har hitin er millum 0°C og ÷1,6°C.

Litur: Hann er javnmyrkagráur ella grábrúnur. Hann hevur hvørki blettir ella bond.

Lýsing: Kaldi úlvfiskur er langur og smidligur fiskur. Stertur er eingin. Hann hevur eina gotfjøður, frá gotinum og aftur í sporlsendan, og eina ryggfjøður av sporlsendanum fram á hálva uggafjøðurina. Hann hevur stórar uggafjaðrar, heilt smáar búkfjaðrar, eina striku, sum gongur oman fyri uggafjøðurina, á skák niður til gotfjøðurina og nakað aftur við henni. Av gronini til fremra enda á gotfjøðurini er 43-47% av heildarlongdini. Høvdið er stórt, millum 23 og 27% av heildarlongdini, og kropshæddin við fremra enda á gotfjøðurini er um 12- 14% av heildarlongdini. Vaksin fiskur hevur roðslu um allan kroppin, frá búkfjaðrafestunum og nakkanum, nakað upp á ryggfjøðurina og niður á gotfjøðurina, men ikki við uggafjaðrarnar.

Eyðkenni: Eina striku. Einlittur.

Týdningur: Kaldi úlvfiskur hevur ikki vinnuligan týdning.

da: Småskællet ålebrosme, ís: Flatmjóri, no: Arktisk ålebrosme

Útbreiðsla: Kaldi úlvfiskur er norðan fyri Ísland og Føroyar og í Hetlandsrennuni, í Landnyrðingsgrønlandi og við Svalbarð. Hann er eisini í arktiska havinum við Sibiria.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017