• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Kikarafiskur (glómuættin)
Epigonus telescopus (Risso, 1810)

Stødd: Kikarafiskur verður upp í umleið 75 cm langur, vanlig longd undir Føroyum er 25-40 cm.

Dýpi: Hann er úr 75 m niður á 1200 metrar, helst eisini djúpari. Ungir fiskar eru uppsjóvarfiskar, gamlir eru bæði uppi í sjónum og niðri við botnin.

Litur: Hann er brún-viólbláur, skyggjandi í ælabogalitum, tá hann er livandi. Trolveiddur fiskur hevur oftast mist roðsluna, og er hann tá óblankur, svart-brúnur um allan kroppin.

Teinar: R1 VI; R2 I + 9-11 (10); G II + 9; U 19-23.

Lýsing: Kropsskapið er eitt sindur køggut. Hann er umleið eins breiður og høgur. Hann hevur tvær rættiliga smáar, høgar og ólíkar ryggfjaðrar, fremra framman fyri miðjan fiskin, og aftara aftanfyri. Hann hevur eina gotfjøður á stødd umleið sum aftara ryggfjøður. Sterturin er nógv sýldur. Hann hevur stóra, leysa roðslu. Høvdið er lutfalsliga stórt. Eyguni eru sera stór, og eygnatvørmátið er nærum helvtina av høvdinum. Gronin er stutt.

Eyðkenni: Kikarafiskur minnir í skapi um gulllaks. Liturin. Tvær ólíkar ryggfjaðrar og tey stóru eyguni.

Týdningur: Aðrastaðni verður nakað veitt av kikarafiski.

da: Kikkertfisk, en: Bigeye – Bulls-eye, fr: Sonneur commun, ís: Glyrnir, no: Teleskopfisk

Útbreiðsla: Undir Føroyum fáast onkrir einstakir kikarafiskar ymsastaðni út av landgrunninum og bankunum vestanfyri og sunnanfyri. Hann er undir Íslandi og Føroyum til Marokko, í vestara parti av Miðjarðarhavinum og úti til havs á Miðatlantsrygginum, á bankum, tindum og grynnum har. Frá Cape Cod til Florida. Á sunnaru hálvu er hann við Nýsæland, Avstralia og Suðurafrika.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017