• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Kjaftsvarti kongafiskur (kongafiskaættin)
Helicolenus dactylopterus
dactylopterus
(Delaroche, 1809)

Stødd: Kjaftsvarti kongafiskur verður í mesta lagi 57 cm langur. Vanliga er hann millum 20 og 35 cm.

Dýpi: Hann er úr 50 m og niður á 1100 m dýpi.

Litur: Hann er reydligur um bakið og ljósari um síðurnar. Oftast hevur hann eini 4-5 óreglulig, myrk bond niður frá bakinum. Hann hevur myrkan blett á kápuni. Gómin er eyðkendur, heilt myrka blávióllittur. Undir búkinum er hann ljósur og einlittur.

Teinar: R XII + 12-13; G II + 5.

Lýsing: Skapið er mest sum á kongafiski. Kjaftarnir eru javnir. Hann hevur eina ryggfjøður, hon er lægst á miðjuni millum harða og bleyta partin. Hann hevur stórar uggafjaðrar, og endarnir á teinunum í niðaru helvt á fjaðrunum stinga útúr. Gotfjøðurin er lægst framman. Búkfjaðrarnar eru umleið eins stórar og gotfjøðurin. Sterturin er rættiliga langur og mest sum beinur aftan.

Á høvdinum hevur hann fleiri píkar enn kongafiskur, framman fyri eyguni, ovast og aftast á kápuni, umframt at píkarnir á kápubeinunum vísa aftureftir. Strikan gongur rættiliga beint úr stertinum upp á nakkan.

Eyðkenni: Kongafiskalíki. Eyðkendur er tann djúpblásvarti bletturin í gómanum. Beru teinarnir í uggafjaðrunum.

Týdningur: Kjaftsvarti kongafiskurin verður ikki avreiddur í Føroyum, men aðrastaðni verður nakað avreitt.

da: Blåkæft, en: Bluemouth, fr: Sébaste chèvre, ís: Svartgóma, no: Blåkjæft, tý: Blaumaul

Útbreiðsla: Frá Norðurnoregi til Suðurafrika. Í Skagerrak, undir Íslandi og Føroyum. Í Miðjarðarhavinum. Á bankum og tindum úti í Atlantshavinum. Í Vesturgrønlandi. Frá Grand Banka til Meksikoflógvan og Brasil. Undir Føroyum er hann á landgrunninum og serliga á bankum og ryggjum sunnanfyri og vestanfyri.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Sporðdrekafiskar Scorpaeniformes

Í sporðdrekahópinum eru 26 ættir, ið hava 279 slektir og 1477 sløg.

Av hesum eru undir Føroyum 7 ættir við 17 slektum og 23 sløgum:

  • Kongafiskaættin (Scorpaenidae)
  • Knurrhanaættin (Triglidae)
  • Ulkuættin (Cottidae)
  • Brynjukruttaættin (Agonidae)
  • Huldukruttaættin (Psychrolutidae)
  • Rognkelsisættin (Cyclopteridae)
  • Súgfiskaættin (Liparidae)

Fiskarnir í hesum hópinum eru í stødd smáir til miðal, sterturin er oftast nakað rundaður aftureftir, onkuntíð innbogin, men sjáldan sýldur. Uggafjaðrarnar eru oftast avrundaðar aftan.

Fiskarnir eru oftast klæddir við píkum ella beinplátum um høvd og bul, yvirhøvur hvassir, harðir og knortlutir fiskar.

Sporðdrekafiskar eru um øll høv, onkur sløg eru í blandingsvatni og onkur eisini í feskvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017