• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Kombikk, horngeil, hvasssíl (kombikkættin)
Gasterosteus aculeatus Linné, 1758

Stødd: Mesta longd er 11 cm, tó í Føroyum neyvan longri enn 8 cm.

Dýpi: Kombikk er í støðuhyljum í fjøruni, í vøtnum, firðum, pollum, ósum og niðast í áum, men ikki í áarstreymi. Tað er eisini í sjónum, fram við landi og langt til havs, har tað helst er ovarlaga í sjónum. Kombikk er fingið á 27 metra dýpi.

Litur: Kombikk er úr silvurgrønum til næstan svart á bakinum, silvurlitt um síðurnar og hvítt undir búkinum. Til havs er liturin líkur sild, tó eitt sindur kámari. Í gýtingini, sum byrjar í apríl og heldur á út á summarið, eru siljafiskarnir reyðir undir høvdinum og um búkin. Rognafiskarnir verða myrkabrúnir um bakið og gulligir um búkin.

Teinar: R II+11 (10-14); G I+9 (8-10); U 9.

Lýsing: Kombikk er lítil og bulmikil fiskur. Tað hevur eina ryggfjøður á sporlinum. Framman fyri ryggfjøðurina eru tríggir hvassir beinpíkar, tveir stórir fremstir og ein minni, ið er beint framman fyri fjøðurina. Undir búkinum, undir aftaru endum á uggafjaðrunum, eru tveir píkar, ein hvørjumegin miðjuna. Hetta eru búkfjaðrarnar, sum eru vorðnar til píkar. Ein píkur er framman fyri gotfjøðurina. Gotfjøðurin er minni enn ryggfjøðurin. Uggafjaðrarnar eru rættiliga stórar. Høvdið er stórt, um 24% av heildarlongdini. Kjafturin er lítil, upprendur. Kombikk hevur undirbit. Sera klæna klingru. Kombikk gýtir í feskum vatni. Nøkur teirra eru alt lívið í feskum vatni. Onnur eru lutvíst í sjónum.

Eyðkenni: Fiskastøddin. Píkarnir og bulmikla skapið.

Týdningur: Tað hevur ikki vinnuligan týdning.

da: Trepigget hundestejle, en: Threespined stickleback, fr: Trois épines, ís: Hornsíli, no: Trepigget stingsild, tý: Dreistacheliger Stichling

Útbreiðsla: Kombikkið er í Svartahavinum, Miðjarðarhavinum og fram við Evropa til Bretsku Oyggjarnar, í Eystarasalti, í Noregi, eystur móti Novaja Semlja. Í Føroyum, Íslandi og Suðurgrønlandi. Frá Labrador til New York. Tað er í Kyrrahavinum úr Beringssundi til Korea og Montereyvíkina í Kalifornia.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Nálafiskar Gasterosteiformes

Í nálafiskahópinum eru 11 ættir, ið hava 71 slektir og 278 sløg.

Undir Føroyum eru 2 ættir, ið hava 5 slektir og 5 sløg:

  • Kombikkaættin (Gasterosteidae)
  • Nálafiskaættin (Syngnathidae)

Hesin hópurin hevur mest smáar fiskar, onkur verður tó upp í 65 cm til longdar. Flestu eru nakað klænir og onkur nakað bøllutur.

Summir hava píkar í ryggfjaðrunum, og á nøkrum eru búkfjaðrarnar vorðnar til píkar. Onkur sløg hava ikki uggafjaðrar ella búkfjaðrar.

Teir hava ikki roðslu, men eru partvíst klæddir við beinplátum.

Teir liva bæði í feskvatni, blandingsvatni og saltvatni, har teir eisini gýta. Hóast smáir, og við lítlari kroppsvekt, so eru teir ofta langt til havs. Teir liva í Atlantshavinum, Kyrrahavinum og Indiahavinum.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017