• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Kongasúgfiskur (súgfiskaættin)
Rhodichthys regina Collett, 1879

Stødd: Kongasúgfiskur verður upp í 31 cm langur.

Dýpi: Hann er botnfiskur, fingin á bleytum botni, úr 1400 m niður á meira enn 2000 m.

Litur: Hann er ljósareyður, ljósviólbláur. Vaksnir fiskar eru hálvgjøgnumskygdir. Royggið er svart.

Lýsing: Kongasúgfiskur er bleytur at føla, hávaksin og tunnur fiskur. Hann hevur stórt høvd, umleið 22-26% av standardlongdini. Kjafturin kemur aftur um eygað. Hægstur er hann um uggafjaðrarnar, mjækkar aftureftir til klingruna, sum endar í einum lítlum sterti. Hann hevur eina langa ryggfjøður, fremst er hon lág, hægst um miðjan fiskin, lækkar so allan vegin út á stertin. Sama er við gotfjøðurini, nakað høg framman. U ggafjaðrarnar eru tvídeildar. Ovari partur er sum vanligar uggafjaðrar, rættiliga stórar, rundar aftan. Niðari partur situr undir øsinum og er bert ein langur, klænur tráður, sum úti á miðjuni fer í tvey ella trý, longdin er umleið aftur á hálvan fiskin. Gotið er fram ímóti øsinum. Hann hevur stór táknaop av súgfiski at vera, tey koma næstan allan vegin niður.

Eyðkenni: Bleyti fiskurin. Liturin og gjøgnumskygnið. Høgur og tunnvaksin. Longu, niðaru uggafjaðrarnar.

Týdningur: Kongasúgfiskur hevur ikki vinnuligan týdning.

da: Rød dybhavsringbug, en: Threadfin seasnail, fr: Limace de mer à filaments, ís: Rósafiskur, no: Kongeringbuk

Útbreiðsla: Kongasúgfiskur er í køldu høvunum norðanfyri. Hann er úr Baffinsflógvanum til Laptevhavið, norðan fyri Føroyar og í Hetlandsrennuni.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Sporðdrekafiskar Scorpaeniformes

Í sporðdrekahópinum eru 26 ættir, ið hava 279 slektir og 1477 sløg.

Av hesum eru undir Føroyum 7 ættir við 17 slektum og 23 sløgum:

  • Kongafiskaættin (Scorpaenidae)
  • Knurrhanaættin (Triglidae)
  • Ulkuættin (Cottidae)
  • Brynjukruttaættin (Agonidae)
  • Huldukruttaættin (Psychrolutidae)
  • Rognkelsisættin (Cyclopteridae)
  • Súgfiskaættin (Liparidae)

Fiskarnir í hesum hópinum eru í stødd smáir til miðal, sterturin er oftast nakað rundaður aftureftir, onkuntíð innbogin, men sjáldan sýldur. Uggafjaðrarnar eru oftast avrundaðar aftan.

Fiskarnir eru oftast klæddir við píkum ella beinplátum um høvd og bul, yvirhøvur hvassir, harðir og knortlutir fiskar.

Sporðdrekafiskar eru um øll høv, onkur sløg eru í blandingsvatni og onkur eisini í feskvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017