• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Kryttlingur (huldukruttaættin)
Cottunculus microps Collett, 1875

Stødd: Kryttlingur verður upp í einar 30 cm langur (kvennfiskur), vanliga um 20 cm. Kallfiskar eru minni enn kvennfiskar.

Dýpi: Kryttlingur er á bleytum botni, úr 170 niður á 1000 m.

Litur: Hann hevur káman, gráan lit við 4, onkuntíð 3 brúnligum, ójøvnum bondum tvørtur um bulin, síðurnar, høvdið og klingruna. Í gráa litinum er ein farri av ljósareyðum.

Teinar: R 6-9 + 13-15; G 9-11; U 15-19.

Lýsing: Kryttlingur hevur ulkuskapilsi, stórt høvd, tjúkkur um nakkan og fremst á bulinum, mjáur aftan. Høvdið er breitt, vanliga breiðari enn langt. Sæð úr erva er høvdið runt framman.

Hann hevur eina ryggfjøður, hon er lág framman, hægri aftan. Á stórum fiskum er mest sum bert ein skræðulepi framman. Allir teinarnir eru bleytir. Búkfjaðrarnar eru mest sum bara tvær slintrur, ið sita nær saman, frammarlaga, mitt undir øsinum. Hann hevur stórar uggafjaðrar. Gotfjøðurin er nakað minni enn aftari partur av ryggfjøðurini. Sterturin er ljósur við dimmum blettum. Hann hevur lutfalsliga lítlan kjaft og smáar tenn. Eyguni eru smá.

Tveir naddar eru oman fyri og inn frá eygunum, og tveir eru uppi á nakkanum. Strikan er sett við 13-15 poknum. Skræðan kennist sum fínt sandpappír. Kallfiskar hava stóra sinu, hon er 7-10% av standardlongdini.

Eyðkenni: Kámi, grái liturin. Dýpið. Flestu ulkufiskar hava tvær ryggfjaðrar, men kryttlingur hevur bert eina. Naddarnir á høvdinum. Høvuðskapið.

Týdningur: Kryttlingur hevur ikki vinnuligan týdning.

da: Almindelig paddeulk, en: Polar sculpin, fr: Cotte polaire, ís: Marhnýtill, no: Paddeulke

Útbreiðsla: Kryttlingur er undir Føroyum. Annars við Svalbarð, úr Barentshavinum til Norðsjógvin. Hann er undir Hetlandi, Íslandi, Eysturgrønlandi, báðumegin í Davisfirði, í Baffinsflógvanum og frá Labrador til New Jersey.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Sporðdrekafiskar Scorpaeniformes

Í sporðdrekahópinum eru 26 ættir, ið hava 279 slektir og 1477 sløg.

Av hesum eru undir Føroyum 7 ættir við 17 slektum og 23 sløgum:

  • Kongafiskaættin (Scorpaenidae)
  • Knurrhanaættin (Triglidae)
  • Ulkuættin (Cottidae)
  • Brynjukruttaættin (Agonidae)
  • Huldukruttaættin (Psychrolutidae)
  • Rognkelsisættin (Cyclopteridae)
  • Súgfiskaættin (Liparidae)

Fiskarnir í hesum hópinum eru í stødd smáir til miðal, sterturin er oftast nakað rundaður aftureftir, onkuntíð innbogin, men sjáldan sýldur. Uggafjaðrarnar eru oftast avrundaðar aftan.

Fiskarnir eru oftast klæddir við píkum ella beinplátum um høvd og bul, yvirhøvur hvassir, harðir og knortlutir fiskar.

Sporðdrekafiskar eru um øll høv, onkur sløg eru í blandingsvatni og onkur eisini í feskvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017