• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm taknaði.

Lakstobis (lakstobisættin)
Paralepis coregonoides Risso, 1820

Stødd: Lakstobis verður upp í 50 cm long.

Dýpi: Hon er miðsjóvarfiskur á djúpum vatni, úr umleið 50 m niður á 1000 metra dýpi.

Litur: Livandi er hon silvurlitt, dimmari á bakinum. Trolveidd er roðslan avfarin, og liturin er tá ljósabrúnligur, ljósari niðarlaga á fiskinum. Kápan er dimm eins og táknaholan.

Teinar: R 9-11; U 14-15; B 9; G 22-24.

Lýsing: Lakstobis er langur og mjávaksin fiskur, høvdið er langt og spískt. Ryggfjøðurin er væl aftan fyri miðjan fiskin. Fitifjøðurin er tætt aftur móti klingruni. Hon hevur uggafjaðrar og búkfjaðrar. Gotfjøðurin er aftast á sporlinum. Eftir strikuni eru 59-61 roðslur. Ryggjargeislar eru 67-73 í tali.

Eyðkenni: Búkfjaðrarnar eru eitt vet fremri enn ryggfjøðurin. Nasagluggarnir eru beint yvir aftara enda á yvirkjaftinum. Á hinum lakstobisunum er yvirkjafturin aftari.

Týdningur: Lakstobis hevur ikki vinnuligan týdning.

da: Nordisk lakstobis, en: Lancet fish, fr: Lussion, ís: Stóra geirsíli, no: Stor laksetobis, tý: Lachsspierling

Útbreiðsla: Hon er frá norðara pólkringi suður til Kanariuoyggjarnar, vestara Miðjarðarhav og eisini í vestara parti av Atlantshavi til Meksikoflógvan. Í føroyskum sjóøki er hon fingin vestanfyri og sunnanfyri.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Langkjaftafiskar Aulopiformes

Hesin hópurin hevur 15 ættir, 44 slektir og umleið 236 sløg.

Av teimum eru undir Føroyum 4 ættir við 6 slektum og 6 sløgum:

  • Mjáfiskaættin (Notosudidae)
  • Háfjaðraættin (Alepisauridae)
  • Lakstobisættin (Paralepididae)
  • Edlafiskaættin (Bathysauridae)

Ymiskir í stødd, frá heilt smáum upp til heilt langar fiskar.

Mjáir og smidligir fiskar við longum høvdi og kjafti, summi sløg við stórum hvøssum tonnum og høgum, longum fjaðrum. Skapið á táknabogunum er serligt, minnir um rimaverk. Nøkur sløg í hesum hópinum liva við botnin, onnur uppi í sjónum.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017