• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Leysikjaftur (ljósfiskaættin) 
Malacosteus niger Ayres, 1848

Stødd: Leysikjaftur verður upp í 24 cm langur.

Dýpi: Hann er undan vatnskorpuni niður á 2500 m.

Litur: Hann er svartur og roðsluleysur.

Teinar: R 16-21; G 18-23; U 6.

Lýsing: Leysikjaftur hevur stóran kjaft, mestsum alt høvdið er kjaftur, og upplatin er høvdið púra avskeplað. Hann hevur stórar tenn, smá eygu fremst á gronini. Reytt ljósgagn er undir eygunum, og eitt ljóst grønligt aftur frá eygunum. Annars eru smá ljósgøgn um stóran part av fiskinum, men ikki á fjaðrunum. Aftast á sporlinum er ein ryggfjøður. Gotfjøðurin er líka stór sum ryggfjøðurin og situr beint undir henni. Búkfjaðrarnar eru beint aftan fyri miðjan fiskin, langar og smalar. Uggafjaðrarnar eru minni enn búkfjaðrarnar, eisini nakað langar og smalar. Hann hevur lítlan og sýldan stert. Hann hevur ikki finnu.

Eyðkenni: Ógvisligi kjafturin, spísku tenninar og reyðu ljósgøgnini við eyguni.

Týdningur: Hann hevur ikki vinnuligan týdning.

da: Smalkæbefisk, en: Stopligth loosejaw, fr: Drague à godet, ís: Kolbíldur

Útbreiðsla: Leysikjaftur er sunnan fyri Hvarvið, í Grønlandsfirði, undir Íslandi og á Íslandsrygginum vestur móti fiskimarkinum. Í Atlantshavinum annars suður á umleið 40°S. Í Kyrrahavinum og Indiahavinum, men er ikki fingin í arktisku og antarktisku høvunum, og er ikki í Miðjarðarhavinum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Ljósfiskar Stomiiformes

Í hesum hópinum eru 5 ættir, 53 slektir og 391 sløg:

Av teimum eru undir Føroyum skrásettar 3 ættir við 7 slektum og 8 sløgum:

  • Seilaættin (Gonostomatidae)
  • Silvurøksættin (Sternoptychidae)
  • Ljósfiskaættin (Stomiidae)

Yvirhøvur smáir fiskar, ið hava ljósføri runt um á kroppi og høvdi. Summir hava finnu. Nakrir hava roðslu, aðrir ikki. Summar av fjaðrunum mangla á nøkrum sløgum. Onkrir hava fitifjøður undir sporlinum. Flestir eru dimmir á liti, og nakrir eru silvurblankir. Ljósfiskar eru bæði djúpt og ovarlaga í sjónum.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017