• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Lítla nebbasild (nebbasildaættin)
Ammodytes tobianus Linné, 1758

Stødd: Lítla nebbasild verður upp í umleið 20 cm long.

Dýpi: Hon er niður á umleið 50 m. Sæst viðhvørt uppi á floti.

Litur: Á bakinum hevur hon gulgrønan lit, ofta við bláligum farra. Gullig um síðurnar og hvít undir búkinum.

Teinar: R 49-58; G 24-32.

Lýsing: Lítla nebbasild hevur langan og klænan kropp, langt og spískt høvd, rundligan tvørskurð. Hevur roðslu heilt aftur til sirini (stertafjøðurina). Roðslan undir búkinum er í beinum røðum. Hon kann skjóta yvirkjaftin fram úr sær. Uggafjaðrarnar røkka aftur um fremra enda á ryggfjøðurini. Hetta er nebbasildin, ið vanliga sæst inni á firðum og sundum.

Eyðkenni: Lítla nebbasild hevur ikki blett við nasagluggarnar. Roðslan á klingruni og undir búkinum.

Týdningur: Undir Føroyum hevur hon verið lítið veidd. Aðrastaðni verður hon veidd til ídnað.

da: Sandgrævlig, en: Sandeel, fr: Equille, ís: Sandsíli, no: Småsil, tý: Kleiner Sandaal

Útbreiðsla: Undir Føroyum er hon á landgrunninum. Hon er frá Portugal norður til Finnmørkina, í Eystarasalti og undir Íslandi.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017