• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Lítlabrosma (hornabrosmuættin) 
Phycis blennoides (Brünnich, 1768)

Stødd: Lítlabrosma verður sjáldan longri enn 100 cm, vanliga 30 til 70 cm.

Dýpi: Hon er botnfiskur úr 50 m niður á 900 m.

Litur: Hon er reyðgrá um bakið, ljósari niðari. Búkfjaðrarnar eru reydligar. Sterturin, gotfjøðurin og ryggfjaðrarnar hava dimma rond. Kjafturin er svartbláur og táknaholurnar svartar. Á trolveiddum fiski eru hesir litir oftast sjávaðir burtur, og hon er gráhvít at síggja.

Teinar: R1 8-12; R2 56-64; G 50-56.

Lýsing: Búkfjaðrarnar á lítlubrosmu eru serliga langar og klænar. Tær eru kloyvdar í ytru helvt og røkka umleið aftur til gotfjøðurina. Hon hevur tvær ryggfjaðrar. Tann fremra er lítil og tríkantað, fremsti teinur er hægstur. Aftara ryggfjøður er long, frá umleið yvir hálvari uggafjøður aftur til stertin. Gotfjøðurin hevur umleið sama skap sum aftara ryggfjøður, men hon er lægri og er umleið 25% styttri. Lítlabrosma hevur lítlan stert, ið er rundaður aftan. Av trantinum til eygað er umleið líka langt sum eygnatvørmátið. Strikan er nógv bogin uppá yvir uggafjøðurini. Hon hevur finnu á lippuni. Hon hevur stóra og leysa roðslu.

Eyðkenni: Tær serliga longu, tvídeildu búkfjaðrarnar. Trolveidd líkist hon morafiski, men kennist alt fyri eitt frá honum á tí, at lítlabrosma hevur bert eina gotfjøður. Morafiskur hevur tvær, og at morafiskur hevur stuttar búkfjaðrar.

Týdningur: Lítlabrosma fæst bert í smáum nøgdum á okkara leiðum og hevur tí ikki havt vinnuligan týdning, men hon er at síggja á fiskamarknaðum við Miðjarðarhavið og er góður matfiskur.

da: Skælbrosme, en: Forkbeard, fr: Phycis de fond, ís: Litla brosma, no: Skjellbrosme, tý: Gabeldorsch

Útbreiðsla: Lítlabrosma er frá Útnyrðingsafrika og í vestara parti av Miðjarðarhavinum til Norðurnoregs. Kring Bretsku Oyggjarnar, undir Føroyum, Íslandi og er eisini langt úti til havs á tindum og bankum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017