• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Lítli tussafiskur (tussafiskaættin)
Cryptopsaras couesii Gill, 1883

Stødd: Kvennfiskar verða upp í 45 cm langir, kallfiskar upp í 7,5 cm. Kallfiskar síggjast viðhvørt hanga undir búkinum á kvennfiskunum, har teir eru grónir fastir, og teir eru tá støðugir sáðbankar og sníkar.

Dýpi: Lítli tussafiskur er botnfiskur og uppsjóvarfiskur, úr vatnskorpuni niður á 2090 metra dýpi.

Litur: Hann er svartur um allan kroppin.

Lýsing: Lítli tussafiskur er samanstúvaður fiskur. Uggafjaðrarnar eru mitt á síðunum á fiskinum, og hvør teirra hevur eini 15 fín bust-hár til fjaðrar. Hann hevur eina ryggfjøður við 4 stórum teinum á sporlinum og eina gotfjøður beint undir ryggfjøðurini. Tær eru nakað líkar, tó gotfjøðurin er nakað minni. Hann hevur tríggjar vørtulíkar vøkstir beint framman fyri ryggfjøðurina. Klingran er heldur førlig. Sterturin hevur 8 teinar, fýra teir mittastu greina seg í tvey í endunum. Á nakkanum millum eyguni er ein long, kløn stong við einum skræðulepa á endanum. Hann hevur stórt høvd, stóran, upprendan kjaft, heilt smá eygu aftarlaga á høvdinum.

Eyðkenni: Litur og útsjónd. Tríggjar „boppur“ á bakinum. Upprendi kjafturin. Bert einans stongin . Longdin úr gronini til uggafjaðrarnar er um 48% av standardlongdini.

Týdningur: Lítli tussafiskur hevur ikki vinnuligan týdning.

da: Trevortet storangler, en: Lesser deepsea angler, fr: Petit pêcheur abyssal, ís: Surtur, no; Liten sjødjevel

Útbreiðsla: Lítli tussafiskur er sjáldsamur fiskur. Nakrir fáir eru fingnir sunnan fyri og vestan fyri Føroyar. Hann er annars í øllum høvum, undir Íslandi til Asoroyggjarnar og Suðurafrika. Í Nýfundlandi til Drakessundið. Hann er eisini í Kyrrahavinum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Tussafiskar Lophiformes

Tussafiskahópurin hevur 18 ættir við umleið 66 slektum og 313 sløgum.

Undir Føroyum eru skrásettar 4 ættir við 5 slektum og 6 sløgum:

  • Havtaskuættin (Lophiidae)
  • Grønlandstussaættin (Himantolophidae)
  • Tussafiskaættin (Ceratidae)
  • Lusiferættin (Linophrynidae)

Undarlig útsjónd sermerkir tussafiskarnar. Teir flestu fiskarnir tykjast trevsutir, og teir flestu hava stórligt rundbøllut skap.

Á fleiri teirra er fremsti teinur í ryggfjøðurini vorðin til eina stong, ið verður brúkt sum tráða við „agni“ at lokka annan fisk til sín.

Oftast stóran kjaft við stórum tonnum, táknaopini eru smá.

Seinir svimjarar og lítið virknir fiskar. Hjá nøkrum teirra eru kallfiskarnir sera smáir og eru viðhvørt at sýggja grónir fastir uppi á kvennfiskunum.

Tussafiskar eru bæði á grunnum og djúpum vatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017