• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Ljósa silvurøks (silvurøksættin) 
Argyropelecus hemigymnus Cocco, 1829

Stødd: Ljósa silvurøks verður upp ímóti 4 cm.

Dýpi: Hon er uppsjóvarfiskur úr 50 m niður á 800 m. Hon er eisini inni á landgrunninum, møguliga við botnin.

Litur: Hon er dimm um bakið, silvurlitt um síðurnar og glær um sporlið við tveimum dimmum bondum um sporlið. Hon hevur ljósgøgn undir búkinum og á sporlinum. Ljósgøgnini eru perlumóðurlitt.

Teinar: R 8; U 10-11; B 6; G1 6; G2 5.

Lýsing: Ljósa silvurøks hevur stuttan, tunnan og høgan bul. Høvdið er stórt, og kjafturin er upprendur. Rørdánað eygu, ið venda beint uppeftir. Sporlið er nakað langt og klænt. Ryggfjøðurin er fremst á sporlinum. Hon hevur lága fitifjøður á sporlinum. Uggafjaðrarnar eru niðast undir kápuni. Gotfjaðrarnar eru tvær. Hon hevur sýldan stert. Týðilig ljósgøgn eru undir búkinum og niðast á sporlinum.

Eyðkenni: Skapið minnir um ein lítlan rukolykil, bulurin og høvdið eru lyklahandfangið. Hon er svørt, silvurlitt og glær. Hon hevur høgt og flatkroyst kropsskap og tvørbond um sporlið.

Týdningur: Ljósa silvurøks hevur ikki vinnuligan týdning.

da: Halvnøgen sølvøkse, en: Hatchet fish, ís: Suðræni silfurfiskur, no: Flekket perlemorsfisk

Útbreiðsla: Ljósa silvurøks er um øll flógv høv. Hon er undir Grønlandi og Føroyum til Suðurafrika og vestara part av Miðjarðarhavinum, sløðist til Íslands. Hon er frá New Jersey til Argentina. Er eisini í Indiahavinum og Kyrrahavinum. Undir Føroyum er hon fingin m.a. á Fugloyarbanka og suður av Munkagrunninum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Ljósfiskar Stomiiformes

Í hesum hópinum eru 5 ættir, 53 slektir og 391 sløg:

Av teimum eru undir Føroyum skrásettar 3 ættir við 7 slektum og 8 sløgum:

  • Seilaættin (Gonostomatidae)
  • Silvurøksættin (Sternoptychidae)
  • Ljósfiskaættin (Stomiidae)

Yvirhøvur smáir fiskar, ið hava ljósføri runt um á kroppi og høvdi. Summir hava finnu. Nakrir hava roðslu, aðrir ikki. Summar av fjaðrunum mangla á nøkrum sløgum. Onkrir hava fitifjøður undir sporlinum. Flestir eru dimmir á liti, og nakrir eru silvurblankir. Ljósfiskar eru bæði djúpt og ovarlaga í sjónum.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017