• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Lútkens úlvfiskur (úlvfiskaættin)
Lycodes luetkenii Collett, 1880

Stødd: Lútkens úlvfiskur verður upp í 49 cm langur.

Dýpi: Hann er fingin millum 839 metrar og 1098 metrar. Hann er í køldum sjógvi, umleið ÷1°C.

Litur: Hann hevur døkkan lit, 5-6 ljós bond frá ovara kanti á ryggfjøðurini og nakað niður á síðurnar, er helst ljósur eisini tvørtur um nakkan og aftur til kápuna.

Teinar: U 23.

Lýsing: Hann er langur og mjávaksin fiskur. Kropshæddin við fremra enda á gotfjøðurini er um 13% av heildarlongdini. Uggafjøðurin er um 16-17% av heildarlongdini. Hann hevur ongan stert, men rygg- og gotfjøðurin ganga saman í ein spíss á sporlsendanum. Hann hevur eina striku mitt aftur eftir síðuni. Roðsla er fram til fremra enda á ryggfjøðurini. Hann er roðsluleysur undir búkinum og á ómakaðu fjaðrunum. Av gronini til fremra enda á gotfjøðurini eru um 48% av heildarlongdini.

Eyðkenni: Longdin av gronini til gotfjøðurina. Hann hevur eina striku.

Týdningur: Hann hevur ikki vinnuligan týdning.

da: Lütkens ålebrosme

Útbreiðsla: Lútkens úlvfiskur er lítið kendur. Menn vita bert um tveir slíkar fiskar á okkara leiðum, annar teirra er veiddur í Hetlandsrennuni í 1910 á 1098 metra dýpi. Lútkens úlvfiskur er vanligari í tí kalda sjónum í Norðurhavinum, við Svalbarð og í Davisfirði.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017