• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Lýsingur (lýsingsættin) 
Merluccius merluccius (Linné, 1758)

Stødd: Lýsingur verður upp í 140 cm langur, vanliga væl minni.

Dýpi: Hann er úr 30 m niður á 1000 metra dýpi. Er bæði við botnin og uppi í sjónum.

Litur: Hann er skifurgráur um bakið, ljósari um síðurnar. Undir búkinum er hann hvítur-gráhvítur. Inni í kjaftinum er hann svartur og táknaholan er svørt.

Teinar: R1 8-11; R2 35-40; G 36-40.

Lýsing: Lýsingur hevur tvær ryggfjaðrar, tann fremra er stutt og høg. Hin aftara long og nakað lægri enn tann fremra. Hann hevur eina langa gotfjøður, smalar uggafjaðrar og smalar búkfjaðrar. Sterturin er mest sum beinur aftan. Hann hevur lítið undirbit, stóran, førligan kjaft við stórum, hvøssum tonnum. Hann hevur ikki finnu.

Eyðkenni: Lýsingur hevur ikki finnu. Smidligur í útsjónd.

Týdningur: Í Føroyum hevur hann ongan vinnuligan týdning, men sunnanfyri verður væl fiskað av lýsingi.

da: Kulmule, en: Hake, fr: Merlu commun, ís: Lýsingur, no: Lysing, tý: Seehecht

Útbreiðsla: Lýsingur sløðist inn í føroyskan sjógv av og á. Annars er hann undir Íslandi og Miðnoregi til Móritania, fram við landi í Miðjarðarhavinum og í syðra parti í Svartahavinum. Hann er bæði inni við land og á víðum havi.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017