• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Mjáangi (angaættin)
Sagamichthys schnakenbecki
(Krefft, 1953)

Stødd: Mjáangi verður upp í umleið 25 cm, kanska longri, vanliga millum 15 cm og 20 cm.

Dýpi: Hann er millum 365 og 1200 metra dýpi.

Litur: Hann er javnt dimmur, dimmbrúnligur.

Lýsing: Mjáangi er hægstur og breiðastur um nakkan, mjækkar aftur til ta høgu klingruna. Høvdið er minni enn 1/3 av standardlongdini. Hann hevur stór eygu, og gronin er styttri enn eygnatvørmátið. Kjaftbeinið kemur aftur til aftaru eygnatrom, ella beint afturum. Ryggfjøðurin situr aftarlaga á bakinum. Gotfjøðurin er umleið hálva ryggfjøður aftari. Búkfjaðrarnar eru aftanvert miðjan fiskin. Hann hevur smáar uggafjaðrar og sýldan stert. Ljósgøgn eru undir búkinum, sporlinum og millum uggafjaðrarnar. Ein lítil angi er í skræðuni beint oman fyri uggafjaðrarnar. Hann hevur onga roðslu á kápuni.

Eyðkenni: Lítli angin oman fyri uggafjøðurina og ljósgøgnini, støddin og liturin. Fremstu tenninar í yvirkjaftinum eru ikki stórar og framrendar, sum í øðrum angum.

Týdningur: Mjáangi hevur ikki vinnuligan týdning.

da: Schakenbecks skulderlysfisk, en: Schnakenbecks searsid, ís: Ránarangi

Útbreiðsla: Mjáangi er sunnan fyri ryggirnar Grønland/ Skotland til Biskeiavíkina. Hann er úti í Atlantshavinum, við Madeira, Grønhøvdaoyggjar og Asoroyggjar og suður til Namibia. Hann er fingin nakrar ferðir á Íslandsrygginum og við bankarnar vestanfyri.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Glitfiskar Argentiniformes

Hesin hópurin hevur 6 ættir, 57 slektir og 202 sløg.

Av teimum eru við Føroyar 4 ættir, ið hava 9 slektir og 12 sløg:

  • Gulllaksaættin (Argentinidae)
  • Blálaksaættin (Microstomatidae)
  • Angaættin (Platytroctidae)
  • Glámaættin (Alepocephalidae)

Fiskasløgini í hesum hópinum eru tey flestu smá, onkur stór inn ímillum, summi nakað bulmikil og onnur long og kløn. Flestu hava stutta gron og lítlan kjaft. Nøkur hava fitifjøður, onnur ikki.

Litirnir á glitfiskunum eru mest blankir, silvurlittir, gulllittir, brúnir ella svartir. Nakrir hava ljósgøgn. Ein ávísur súrligur luktur gongur at flestum teirra.

Nakrir eru lutvíst í feskum vatni, annars um øll høv.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017