• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Mórubróðir (moraættin) 
Guttigadus latifrons Holt & Byrne, 1908

Stødd: Mórubróðir verður upp í 19 cm úr trantinum aftur í klingruna.

Dýpi: Hann er við botnin og uppfrá, á dýpum millum 770 m og 1875 m.

Litur: Inni í kjaftinum og í táknaholunum er hann dimmur, annars veitst einki um litin.

Teinar: R1 + R2 69-82; G 61-76.

Lýsing: Tjúkkastur er mórubróðir um bulin, hann hevur klæna klingru og tvær ryggfjaðrar, mest sum samanvaksnar. Fremra er lítil og tríkantað, hægst framman. Fyrsti teinur er eins høgur ella eitt sindur hægri enn teinarnir í aftaru ryggfjøður. Aftara ryggfjøður er long, kemur heilt aftur í klingruna. Gotfjøðurin er næstan eins long, og hon kemur næstan fram á hálva uggafjøðurina. Sterturin er lítil og rundur. Uggafjaðrarnar eru smáar, og tær eru festar beint undir fremra enda á fremru ryggfjøður. Mórubróðir hevur smalar og nakað langar búkfjaðrar. Finnan er sera lítil. Kjaftklovin kemur aftur undir hálvt eygað. Høvdið er stórt, um 21-24% av heildarlongdini. Hann hevur stór eygu, og gronin er umleið líka long sum eygnatvørmátið. Hetta fiskaslagið er lítið kent.

Eyðkenni: Lítli fiskurin, stóra høvdið og klæna klingran.

Týdningur: Mórubróðir hevur ikki vinnuligan týdning.

ís: Mórubróðir

Útbreiðsla: Mórubróðir er sunnan fyri Føroyar, við Lúsabanka og norður móti sjómarkinum sunnanfyri. Sunnan fyri Ísland, vestan fyri Írland til Portugals. Ein er fingin í Miðjarðarhavinum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017