• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Nasi (nasafiskaættin)
Nesiarchus nasutus Johnson, 1862

Stødd: Nasi verður upp í umleið 130 cm langur.

Dýpi: Hann er úr 200 m niður á 1200 m, bæði við botnin og uppi í sjónum.

Litur: Hann er dimmbrúnur ella svartur um bakið, við viólbláum farra um síðurnar og undir búkinum. Strikan er hvít. Fjaðrarnar eru svartar, og hann er svartur inni í kjaftinum.

Teinar: R1 XIX-XXII; R2 19-22 + 2 Smáfj.; G II + 16-21 + 2 Smáfj.; U 12-14; B 5;

Lýsing: Nasi er mjávaksin fiskur, hægri enn breiður. Hann er spískur framman og aftan. Hann hevur tvær ryggfjaðrar, sum eru samanvaksnar, tann fremra hevur beinteinar og er long og lág, av nakkanum aftur til sporlið. Tann aftara hevur bleytar teinar og er á sporlinum, stutt, men hægri enn tann fremra. Gotfjøðurin er mest lík aftaru ryggfjøðurini. Tveir píkar eru framman fyri gotfjøðurina, tann fremri er størri. Aftast eru tvær smáfjaðrar, bæði undir og yvir. Hann hevur smáar uggafjaðrar og smáar búkfjaðrar, lítið sýldan stert. Strikan er næstan bein og gongur úr stertinum og upp á nakkan. Hann hevur stórt undirbit. Trantur er fram úr undirkjaftinum.

Eyðkenni: Hvíta strikan. Smáu fjaðrarnar á klingruni. Spíska gronin. Hørðu og bleytu ryggfjarðateinarnir.

Týdningur: Nasi hevur ikki vinnuligan týdning í Føroyum og lítlan týdning aðrastaðni.

da: Geddetryne, en: Black gemfish, fr: Escolier long nez, ís: Nasi, no: Havgjedde

Útbreiðsla: Nasi er fingin í føroyskum sjógvi sunnan fyri bankarnar vestanfyri og á Íslandsrygginum, men er ikki so vanligur her um leiðir. Í Atlantshavinum er hann annars undir Noregi og Íslandi til Kanariuoyggjarnar, Madeira, Asoroyggjarnar til Suðurafrika. Hann er vestanfyri frá Flemish Cap og Karibiaoyggjunum til Brasil og Argentina. Hann er eisini í Indiahavinum og Kyrrahavinum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017