• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Paddufiskur (toskaættin)
Raniceps raninus (Linné, 1758)

Stødd: Paddufiskur verður í mesta lagi 30 cm langur, vanliga upp í 25 cm.

Dýpi: Vanliga er hann úr vatnskorpuni niður á 100 metra dýpi, undir Føroyum tó niður á 140 m.

Litur: Hann er javnt dimm- ella blábrúnur um allan kroppin. Fjaðraendar og granar eru ljósari, tó er hann ikki ljósari um uggafjaðrarnar.

Teinar: R1 3; R2 60-66; G 53-60.

Lýsing: Paddufiskur hevur smalt sporl og er breiðvaksin framman. Fremra ryggfjøðurin er evarska lítil. Aftara ryggfjøðurin er long og nakað høg. Gotfjøðurin er heldur styttri enn aftara ryggfjøður, annars eru tær í skapi nakað líkar. Hann hevur rættiliga stórar og rundar uggafjaðrar. Búkfjaðrarnar eru smáar, og tveir teir fremstu teinarnir eru langir. Sterturin er rundaður aftan. Paddufiskur hevur stórt høvd. Kjaftklovin kemur aftur um eygað.

Eyðkenni: Breiði framparturin, ið smalkar ógvisliga aftan fyri endarnar á uggafjaðrunum.

Týdningur: Paddufiskur hevur ikki vinnuligan týdning.

da: Sortvels, en: Tadpole fish, fr: Trident, no: Paddetorsk, tý: Froschdorsch

Útbreiðsla: Paddufiskur er í Biskeiavíkini, kring Bretsku Oyggjarnar, í Norðsjónum, í donskum sjógvi til Tróndheims og Føroya.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017