• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Rísna langasporl (langasporlsættin) 
Macrourus berglax Lacepède, 1801

Stødd: Tað verður minst 110 cm langt.

Dýpi: Rísna langasporl er úr umleið 100 m niður á 3000 m.

Litur: Rísna langasporl er myrkagrátt ella øskugrátt um bakið og fjaðrarnar og silvurgrátt undir búkinum. Trolveitt hevur tað mist flestar litir og tykist hvítgrátt.

Teinar: R1 11-13; U 17-20.

Lýsing: Rísna langasporl hevur tvær ryggfjaðrar. Tann fremra er lítil, men høg og situr heilt fram móti nakkanum. Hin aftara er lág og long, gongur heilt aftur á sporlsendan, har hon rennur saman við gotfjøðurina, ið er næstan eins long og ryggfjøðurin. Frá gotinum og aftur á sporlsendan smalkar fiskurin javnt, og stertur er eingin. Tað hevur stórt høvd, um 20% av heildarlongdini og stór eygu. Roðslan er hvøss. Rísna langasporl hevur myrkan blett við gotið og millum búkfjaðrarnar. Gronin er líka long sum eygnatvørmátið. Tað hevur ein beinkamb hvørjumegin á høvdinum, undir eyganum og oman fyri kjaftin.

Eyðkenni: Tann sera rísna roðslan, og beinkamburin á høvdinum. Tað hevur ikki roðslu undir trantinum. Rísna langasporl er høvuðstórt og bulmikið.

Týdningur: Nakað verður veitt av rísna langasporli.

da. Nordlig skolæst, en: Roughhead grenadier, fr: Grenadier gris, ís: Snarpi langhali, no: Isgalt, tý: Grenadierfisch

Útbreiðsla: Rísna langasporl er við Svalbarð til Bergensleiðina, Íslands, Vesturgrønlands, Labrador til Massachusetts. Undir Føroyum er tað sunnanfyri, út av Munkagrunninum, Bankarygginum og bankunum vestanfyri og suður á Hattonbanka.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017