• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Rottutrónur (moraættin) 
Antimora rostrata (Günther, 1878)

Stødd: Rottutrónur verður upp í 75 cm langur, men er vanliga millum 40-55 cm.

Dýpi: Hann er úr 350 m niður á 3000 m.

Litur: Rottutrónur er svartur, grásvartur við einum bláligum farra.

Teinar: R1 4-5; R2 55-61; G 36-44;

Lýsing: Rottutrónur hevur tvær ryggfjaðrar. Tann fremra er lítil, og fremsti teinur er serliga høgur. Aftara ryggfjøður er long. Hon er frá klingruni fram til fremru ryggfjøður. Hann hevur eina gotfjøður, ið er lægst á miðjuni. Búkfjaðrarnar eru smalar og langar, koma næstan aftur til endan á uggafjaðrunum. Uggafjaðrarnar sita beint undir fremru ryggfjøður. Rottutrónur hevur lítlan stert. Strikan er mest sum bein. Gotið er beint um ella beint aftan fyri miðjuna á fiskinum. Høvdið er serligt við sínum beinkambi úr trantinum og inn undir eyguni. Hann hevur spíska og nakað breiða og flata gron, yvirbit og finnu. Eygnatvørmátið er heldur minni enn longdin á gronini. Hann hevur ein lítlan beinodd aftast á kápuni.

Eyðkenni: Beinkamburin, ið er frá trantinum til inn undir eyguni, spíski tranturin, skapið á fremru ryggfjøður og gotfjøðurini.

Týdningur: Rottutrónur hevur ikki vinnuligan týdning.

da: Blå antimora, en: Blue antimora, fr: Antimore bleu, ís: Fjólumóri

Útbreiðsla: Rottutrónur er toluliga vanligur fiskur á djúpum vatni vestan fyri Føroyar. Hann er annars í nærum øllum Norðuratlantshavinum sunnan fyri ryggirnar Grønland- Skotland, á bankum og tindum suður móti Asoroyggjunum og úti fyri Portugal. Hann er frá North Carolina til Baffinslands. Er eisini í Suðuratlantshavinum, Kyrrahavinum og í Antarktisku høvunum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017