• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Sævarangi (angaættin) 
Normichthys operosus Parr, 1951

Stødd: Sævarangi verður upp í 16 cm.

Dýpi: Hann er á umleið 1000 metra dýpi.

Litur: Hann er dimmbrúnur.

Teinar: R 18-20; G 16-18; B 6-7;

Lýsing: Bulurin er høgur og nakað smalur aftur til gotið. Ryggfjøður er ein, og hon situr væl aftan fyri miðjuna á fiskinum. Gotfjøðurin situr eitt vet aftari og kemur aftur til tað smalasta á klingruni. Smáar búkfjaðrar sita beint aftan fyri miðjan fiskin, aftur móti gotfjøðurini. Uggafjaðrarnar eru smáar og sita nakað niðarlaga á ugganum. Ein lítil naddi, angi, er í skræðuni beint oman fyri uggafjøðurina. Sævarangi hevur stórt høvd, umleið ella minni enn 1/3 av standardlongdini. Kjafturin kemur ikki aftur um eygað. Hann hevur nakað spíska gron, hon er líka long sum eygnatvørmátið. 2-4 stór og fleiri smá hol eru inn í skræðuna uppi við nakkan, oman fyri kápuna. Strikan er bein.

Eyðkenni: Tættvaksni, lítli fiskurin, stóra høvdið, tann lítli angin yvir uggafjøðurini, holini í skræðuni oman fyri kápuna, og kjafturin kemur ikki aftur um eygað.

Týdningur: Sævarangi hevur ikki vinnuligan týdning.

da: Grubet skulderlysfisk, en: Multipore searsid, ís: Sæangi.

Útbreiðsla: Hann er út av Lúsabanka til Asoroyggjar og Norðurportugals. Úr Davisfirði til Florida, í Grønlandsfirði, sunnan fyri Ísland til Angola í Útsynningsafrika.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Glitfiskar Argentiniformes

Hesin hópurin hevur 6 ættir, 57 slektir og 202 sløg.

Av teimum eru við Føroyar 4 ættir, ið hava 9 slektir og 12 sløg:

  • Gulllaksaættin (Argentinidae)
  • Blálaksaættin (Microstomatidae)
  • Angaættin (Platytroctidae)
  • Glámaættin (Alepocephalidae)

Fiskasløgini í hesum hópinum eru tey flestu smá, onkur stór inn ímillum, summi nakað bulmikil og onnur long og kløn. Flestu hava stutta gron og lítlan kjaft. Nøkur hava fitifjøður, onnur ikki.

Litirnir á glitfiskunum eru mest blankir, silvurlittir, gulllittir, brúnir ella svartir. Nakrir hava ljósgøgn. Ein ávísur súrligur luktur gongur at flestum teirra.

Nakrir eru lutvíst í feskum vatni, annars um øll høv.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017