• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Sandstubbi (stubbafiskaættin)
Pomatoschistus minutus (Pallas, 1770)

Stødd: Tann størsti sandstubbin, sum fingin er undir Føroyum, var 9,1 cm langur. Hann er annars sjáldan størri enn 7,5 cm og verður neyvan longri enn 11 cm.

Dýpi: Sandstubbi er vanligast úr fjøruni (0,5 m) út á 12 - 15 m. Hann er tó aðrastaðni fingin á 300 m dýpi. Í Føroyum er hann fingin á víkum og firðum út á 40 m dýpi.

Litur: Vanliga er hann sandbrúnur ella sandgráur um bak og síður. Hann er rómalittur undir búkinum. Dimmar ella rustlittar óregluligar strikur og blettir eru av bakinum og niður á síðurnar, tó ikki á uggunum og undir búkinum. Fremra ryggfjøður hevur á afturendanum ein svartan blett, men hann sæst illa á deyðum fiski.

Teinar: R1 VI (VII ); R2 I + 10-12; G I + 9-12.

Lýsing: Sandstubbi hevur tvær ryggfjaðrar. Tann fremra væl minni enn tann aftara. Búkfjøðurin røkkur aftur um uggafjøðurina, til gloppið millum ryggfjaðrarnar. Gotfjøðurin er eins stór og aftara ryggfjøður. Sterturin er rundaður aftan. Fjaðrarnar hava strípur umleið sama lit sum tey myrku støðini á kroppinum, tó ikki uggafjaðrarnar og búkfjaðrarnar. Roðsla er oman á bakinum framman fyri fremru ryggfjøður. Hann hevur breitt høvd og bungutar kjálkar. Eyguni eru smá og standa út úr høvdinum. Hann sæst ikki so ofta sum tvíprikkuti stubbi.

Eyðkenni: Støddin, liturin og tað, at búkfjøðurin kemur aftur um uggafjøðurina. Dimmi bletturin á ryggfjøðurini.

Týdningur: Hann hevur ikki vinnuligan týdning.

da: Sandkutling, en: Sand goby, fr: Gobie buhotte – Gobie des sables, no: Sandkutling; tý: Sandkühling  

Útbreiðsla: Sandstubbi er undir Føroyum, við Bretsku Oyggjarnar til Tromsø. Hann er í Eystarasalti norður til Álandsoyggjarnar, í Norðsjónum til vestara part av Miðjarðarhavinum, í Adriahavinum og í Svartahavinum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017