• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Silvurbramafiskur (bramafiskaættin)
Pterycombus brama Fries, 1837

Stødd: Silvurbramafiskur verður upp í 55 cm langur, men er vanliga minni enn 40 cm.

Dýpi: Hann er uppsjóvarfiskur á víðum havi, úr 25 metra dýpi niður á 300 metra dýpi. Onkuntíð sæst hann inni við land.

Litur: Hann er silvurlittur við svørtum undirliti. Rygg- og gotfjøður eru svartar fremst, verða líðandi mest sum gjøgnumskygdar aftast.

Teinar: R 48-53; G 40-43; U 20-23.

Lýsing: Silvurbramafiskur er høgur og tunnur fiskur. Kropshæddin er um helvtina av standardlongdini. Hann hevur eina ryggfjøður, ið er serliga høg. Hon gongur av nakkanum aftur í klingruna. Gotfjøðurin byrjar undir uggafjaðrafestinum og gongur aftur í klingruna. Eisini hon er høg. Ryggog gotfjøðurin kunnu leggjast í eina foyru, so tær eru fjaldar. Hann hevur langar uggafjaðrar, ið koma umleið aftur á hálvan fiskin, smáar búkfjaðrar, stóran, spískan og sýldan stert við nakað longum stertafjaðrum. Hann hevur lítið høvd við stuttari gron og rundligum umhvarvi. Hann hevur stór eygu, ið sita frammarlaga á gronini, stóran, upprendan kjaft. Strikan er sjónlig á smáum fiskum, men er burtur á stórum fiskum. Hann hevur rísna roðslu.

Eyðkenni: Kropsskapið. Høvuðumhvarvið. Stóru eyguni. Gronin framman fyri eyguni er umleið so long sum eygnasteinstvørmátið. Liturin og fjaðralongdirnar.

Týdningur: Silvurbramafiskur hevur lítlan týdning í fiskivinnuni og ongan her hjá okkum.

da: Sølvbrasen, en: Atlantic fanfish – Rough pomfret, fr: Poisson-éventail Atlantique, ís: Silfurbrami, no: Sølvbrasme, tý: Silberbrassen

Útbreiðsla: Undir Íslandi, Føroyum og Norðurnoregi til Vesturafrika tvørtur um Atlantshavið til Meksiflógvan og Nova Scotia. Í Skagerrak og norðara parti av Norðsjónum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017