• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Silvurmurtur (toskaættin) 
Gadiculus argenteus thori
Schmidt, 1914

Stødd: Silvurmurtur verður upp í góðar 19 cm, vanliga um 8-11 cm langur.

Dýpi: Hann er úr 60 metra dýpi niður á 1000 metra dýpi.

Litur: Á livandi fiski er liturin kámur silvurlitur, og hann er dimt spølutur um høvd og bak. Á trolveiddum fiski er roðslan oftast avfarin, og hann er tí gráligur, kámur og glærur.

Teinar: R1 8-12; R2 10-14; R3 11-16; G1 15-18; G2 12-16.

Lýsing: Silvurmurtur hevur tríggjar ryggfjaðrar, tvær gotfjaðrar, ið eru eitt sindur størri enn ryggfjaðrarnar. Hann hevur smáar búkfjaðrar og smáar uggafjaðrar. Hann hevur ikki finnu. Strikan er næstan bein, ein lítil bogi er oman fyri uggafjøðurina. Hann hevur undirbit, nógv upprendan, næstan loddrættan kjaft. 7 djúpar kullur eru niður í skallan.

Eyðkenni: Hann minnir um hvítingsbróður. Serligt fyri silvurmurt eru tær sjey slímkullurnar niður í skallan, støddin og kámi liturin.

Týdningur: Nakað av silvurmurti fæst sum hjáveiða í ídnaðarfiskiskapinum, men annars hevur hann ikki vinnuligan týdning.

da: Sølvtorsk, en: Silvery pout, fr: Merlan argentée, ís: Silfurkóð, no: Sølvtorsk, tý: Silberdorsch

Útbreiðsla: Silvurmurtur er frá Norðkapp og Íslandi til Skagerrak og Biskeiavíkina. Undir Føroyum er hann í øllum hellingunum og nakað inn á grunnin. Á Lúsabanka er nógvur silvurmurtur viðhvørt.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017