• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Silvurstinglaksur (stinglaksaættin)
Lepidopus caudatus (Euphrasen, 1788)

Stødd: Silvurstinglaksur verður upp í 210 cm langur.

Dýpi: Hann er botnfiskur og uppsjóvarfiskur. Hann gongur í torvum úr 100 m niður á 600 m dýpi.

Litur: Hann er silvurlittur, dimmur um fjaðrarnar.

Teinar: R IX + 90-107; U 12.

Lýsing: Silvurstinglaksur er langur og mjávaksin fiskur. Hann er hægri, enn hann er breiður. Hann hevur eina langa ryggfjøður. Gotfjøðurin er í einum undir klingruni og bert leysir broddar eru haðani og fram til gotið. Hann hevur smáar búkfjaðrar, smáar uggafjaðrar og lítlan stert. Høvdið hækkar aftan fyri eyguni upp móti ryggfjøðurini. Hann hevur stór eygu og stóran kjaft við hvøssum tonnum.

Eyðkenni: Kropsskapið kann minna um eitt stórt svørðsblað. Høga ennið. Lítli sterturin.

Týdningur: Hann hevur ikki vinnuligan týdning í Føroyum, men verður nógv veiddur aðrastaðini.

da: Strømpebåndsfisk, en: Scabbard fish, fr: Sabre argenté, ís: Marbendill, no: Slirefisk, tý: Degenfisch

Útbreiðsla: Silvurstinglaksur kemur norður móti Føroyum, men er ikki skrásettur í føroyskum sjógvi. Hann sløðist til Íslands, er annars vestan fyri Írland til Senegals, við Suðurafrika og Madagaskar, nakað inn í Miðjarðarhavið. Úti í Atlantshavinum er hann á tindum og bankum. Hann er eisini við Suðuravstralia og Nýsæland.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017