• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Sjóprónur (nálafiskaættin)
Entelurus aequoreus (Linné, 1758)

Stødd: Sjóprónur verður upp í 60 cm langur. Undir Føroyum er vanlig longd 30-50 cm.

Dýpi: Sjóprónur er fingin úr 5 m niður á 600 m dýpi. Undir Føroyum er hann fingin á landgrunninum, á Føroyabanka og í flótitroli sunnan fyri Føroyar á 400-600 m dýpi. Hann er onkuntíð funnin í fjøruni í Føroyum. Sæst av og á í fiskamaga.

Litur: Hann er brúnligur ella gulligur við dimmum tvørbondum.

Lýsing: Sjóprónur líkist øðrum sjónálum, langur og klænur. Tjúkkastur er hann um bulin, sporlið klænkar aftur í nærum einki. Tranturin er eins langur og ella longri enn høvdið, og kjafturin er bendur upp. Hann hevur ikki uggafjaðrar, búkfjaðrar ella gotfjaðrar, og bert ein viðfáning av sterti. Ryggfjøðurin er eisini heilt lítil og situr beint framman fyri miðjuna á fiskinum, og miðjan á fjøðurini er væl framman fyri gotið. Ringar eru tvørtur um kroppin, framman fyri gotið eru 28 upp í 31, og aftan fyri eru 60 upp í 69. Ringarnir eru týðiligir á deyðum fiski. Teir hómast neyvan á livandi fiski. Hetta er fiskur, sum livir úti á havinum, tó at hann eisini fæst við land.

Eyðkenni: Nálalíka skapið. Gotið er undir aftara enda á ryggfjøðurini. Hann hevur bert stert og ryggfjøður.

Týdningur: Hann hevur ikki vinnuligan týdning.

da: Snippe, en: Snake pipefish, fr: Entèlure de mer, ís: Stóra sænál. no: Stor havnål, tý: Grosse Schlangennadel

Útbreiðsla: Hann er av Suðurlandinum í Íslandi til Føroya, Noregs og inn í Kattegat. Hann er suður við strondum Evropa til Portugals og er eisini við Asoroyggjarnar.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Nálafiskar Gasterosteiformes

Í nálafiskahópinum eru 11 ættir, ið hava 71 slektir og 278 sløg.

Undir Føroyum eru 2 ættir, ið hava 5 slektir og 5 sløg:

  • Kombikkaættin (Gasterosteidae)
  • Nálafiskaættin (Syngnathidae)

Hesin hópurin hevur mest smáar fiskar, onkur verður tó upp í 65 cm til longdar. Flestu eru nakað klænir og onkur nakað bøllutur.

Summir hava píkar í ryggfjaðrunum, og á nøkrum eru búkfjaðrarnar vorðnar til píkar. Onkur sløg hava ikki uggafjaðrar ella búkfjaðrar.

Teir hava ikki roðslu, men eru partvíst klæddir við beinplátum.

Teir liva bæði í feskvatni, blandingsvatni og saltvatni, har teir eisini gýta. Hóast smáir, og við lítlari kroppsvekt, so eru teir ofta langt til havs. Teir liva í Atlantshavinum, Kyrrahavinum og Indiahavinum.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017