• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Sloans ormsfiskur (ljósfiskaættin) 
Chauliodus sloani
Bloch & Schneider, 1801

Stødd: Sloans ormsfiskur verður upp í 35 cm langur.

Dýpi: Hann fer djúpari enn 1000 m um dagin, kanska niður á 2800 m og upp undir vatnskorpuna á nátt. Hann er fingin við botná Íslandsrygginum á umleið 450 m.

Litur: Hann hevur ælabogalitir um síðurnar, silvurblankur um kápuna, svart-silvurbláligur um bakið og undir búkinum.

Teinar: R 7 (5-8); G 10-13; U 9-14; B 7;

Lýsing: Sloans ormsfiskur er klænur fiskur við stuttum, men stórum høvdi. Kjafturin er stórur við ógvisliga stórum tonnum, langar, spískar og nakað bogaðar innyvir. Við afturlatnum kjafti standa tenninar í undirkjaftinum upp við gronini. Hann hevur lítla ryggfjøður næstan frammi við nakkan, fremsti teinur umleið 3 ferðir longri enn hinir. Uggafjaðrarnar eru heilt frammi við kápuna. Búkfjaðrarnar eru frammanvert miðjuna. Gotfjøðurin er heilt afturi við klingruna. Hann hevur eina fitifjøðurlíka fjøður oman á sporlinum og eina framman fyri gotfjøðurina. Hann hevur smá ljósgøgn, eini 50 niðast eftir síðunum, frá ugganum aftur til stertin.

Eyðkenni: Stóru og hvøssu tenninar, ljósgøgnini, klæna skapið.

Týdningur: Hann hevur ikki vinnuligan týdning.

da: Sabeltandfisk, en: Sloan’s viperfish, fr: Chauliode de sloane, ís: Slóans gelgja, no: Huggormfisk

Útbreiðsla: Hann er vanligur norður til 55° í Atlantshavinum, sløðist til Føroya og Íslands. Hann er fingin sunnan fyri Føroyabanka og Ytrabanka umframt á Íslandsrygginum. Hann er annars í øllum teimum heitu og flógvu høvunum, heilt suður á umleið 45°S.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Ljósfiskar Stomiiformes

Í hesum hópinum eru 5 ættir, 53 slektir og 391 sløg:

Av teimum eru undir Føroyum skrásettar 3 ættir við 7 slektum og 8 sløgum:

  • Seilaættin (Gonostomatidae)
  • Silvurøksættin (Sternoptychidae)
  • Ljósfiskaættin (Stomiidae)

Yvirhøvur smáir fiskar, ið hava ljósføri runt um á kroppi og høvdi. Summir hava finnu. Nakrir hava roðslu, aðrir ikki. Summar av fjaðrunum mangla á nøkrum sløgum. Onkrir hava fitifjøður undir sporlinum. Flestir eru dimmir á liti, og nakrir eru silvurblankir. Ljósfiskar eru bæði djúpt og ovarlaga í sjónum.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017