• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Spøluti úlvfiskur (úlvfiskaættin)
Lycodes seminudus Reinhardt, 1837

Stødd: Spøluti úlvfiskur verður upp í 52 cm langur, vanliga 25-40 cm.

Dýpi: Hann er botnfiskur á bleytum botni úr 130 metrum niður á 1400 metrar, men mest úr 200 metrum niður á 600 metrar. Sjógvurin, har hann er, er altíð kaldari enn 0°C.

Litur: Liturin er broytiligur, brúnligur, javndimmbrúnligur, ella næstan svartur. Oftast eru 5-8 stutt, ljóstgrálig bond um bakið og niður á síðurnar. Ofta er eisini slíkt band um nakkan. Bondini eru bein á skák frameftir í beinari linju, boga ikki frameftir, sum á onkrum úlvfiskum. Hann hevur myrkt royggj við tøttum, svart-brúnum blettum.

Teinar: U 20-21 (19-22).

Lýsing: Spøluti úlvfiskur er langur, smidligur fiskur. Hæddin á fiskinum við gotið er umleið 9-11% av heildarlongdini, og longdin av gronini aftur til gotið er 48-52%. Uggafjøðurin er um 10-12% av heildarlongdini. Hann hevur heilt smáar búkfjaðrar heilt frammi undir øsinum. Hann hevur eina striku mitt eftir síðuni. 96 ryggjargeislar. Hann er smáskrubbutur fram á hálvan fiskin. Ryggfjøðurin og gotfjøðurin eru roðsluleysar.

Spøluti úlvfiskur hevur rættiliga stórt høvd, 24-25,5% av heildarl ongdini . Hann hevur heldur flata gron. Hann hevur ikki stert, men ryggfjøður og gotfjøður ganga saman í ein spíss aftast á sporlsendanum.

Eyðkenni: Hevur eina striku. Beinu bondini. Roðsla er frá gotinum og aftureftir.

Týdningur: Spøluti úlvfiskur hevur ikki vinnuligan týdning.

da: Halvnøgen ålebrosme, en: Longear eelpout, fr (Can.): Lycode à oreilles, ís: Hálfberi mjóri, no: Storhodet ålebrosme

Útbreiðsla: Spøluti úlvfiskur er frá Ittoqqortoomiitleiðini og Grønlandsfjørðinum um Norðurlandið í Íslandi, norðan fyri Íslandsryggin, til eystur um Føroyar. Sunnan fyri Jan Mayen, við Svalbarð og í norðaru pørtunum av Barentshavinum. Hann er í Beaufortshavinum og Karahavinum.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017