• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Steinbítur (steinbítaættin)
Anarhichas lupus Linné, 1758

Stødd: Steinbítur verður upp í 150 cm langur, vanliga minni enn 110 cm.

Dýpi: Hann er úr fjøruni og út á meira enn 500 m dýpi.

Litur: Um bakið og síðurnar er hann blágráur við 11-12 myrkum tvørbondum. Hann er ljósari undir búkinum. Viðhvørt er steinbítur brúngrønligur.

Lýsing: Steinbítur er nakað mjávaksin fiskur, hann er hægri, enn hann er breiður. Hann hevur eina langa ryggfjøður av nakkanum aftur í klingruna. Hann hevur eina gotfjøður frá gotinum aftur í klingruna. Báðar eru leysar úr stertinum. Gotfjøðurin er umleið 2/3 so long sum ryggfjøðurin. Sterturin er rundaður aftan og er rættiliga lítil eftir støddini á fiskinum. Hann hevur stórar, rundar uggafjaðrar og ongar búkfjaðrar.

Høvdið er lítið og rundleitt, eitt sindur kubbut við stuttari, rundari gron. Hann hevur ógvuliga sterkan kjaft, við avrundaðum og framstandandi tonnum, og hann bítur fast. Eyguni eru smá og sita rættiliga tætt saman ovarlaga á heysinum.

Eyðkenni: Serliga tær myrku tvørstrikurnar og tann grábláa skræðan. Sterku tenninar, og tað, at hann bítur ógvuliga fast.

Týdningur: Steinbítur er virðismikil fiskur, sum verður seldur á fiskamarknaðunum, eisini í Føroyum.

da: Havkat, en: Catfish, fr: Loup de mer, ís: Steinbítur, no: Gråsteinbit, tý: Katfisch

Sí myndir og videoklipp her.

Útbreiðsla: Steinbítur er vanligur undir Føroyum, Íslandi og í Grønlandi frá Ittoqqortdormiit í Eysturgrønlandi til Disko. Annars er hann frá Novaja Semlja, Svalbarði, í Hvítahavinum og suður til Ermarsund. Vestanfyri er hann við Baffinsoynna og Labrador til Cape Cod.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017