• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Stuttskeggjað langasporl (langasporlaættin)
Coryphaenoides brevibarbis
(Goode & Bean, 1896)

Stødd: Stuttskeggjað langasporl verður í minsta lagi 35 cm langt.

Dýpi: Tað er við botnin og uppi í sjónum úr 1500 m niður á 3200 m dýpi.

Litur: Tað er bleikt brúnt. Granar, kjaftur, royggj og táknaholur eru svørt.

Teinar: R1 9-10; U 18-20; G 8-9;

Lýsing: Stuttskeggjað langasporl er heldur mjávaksin fiskur, hægst við fremru ryggfjøður, mjækkar skjótt frá bulinum, aftur í sporlsendan.

Stertur er eingin. Tað hevur tvær ryggfjaðrar, tann fremra er lítil, høg og tríkantað, fremsti teinur er serliga høgur. Hin aftara er long og lág og gongur aftur í sporlsendan, har hon rennur saman við gotfjøðurini. Gotfjøðurin er longri enn aftara ryggfjøður og er úr gotinum aftur í sporlsendan. Gotið er undir aftara enda á fjøðurfestinum á fremru ryggfjøður. Tað hevur smáar uggafjaðrar og smáar búkfjaðrar.

Høvdið er um 20% av heildarlongdini. Stuttskeggjað langasporl er breitt millum eyguni, meira enn 25% av høvuðlongdini. Kjafturin er stórur og er fremst undir gronini. Lítil finna er undir undirkjaftinum, minni enn eygnatvørmátið. Tað hevur smá eygu, og kjaftklovin kemur aftur undir tey. Tranturin gongur mest sum beint upp úr yvirkjaftinum, og høvdið er haðani í einum jøvnum boga aftur á nakkan.

Eyðkenni: Mjáa vakstrarlagið. Búkfjaðrarnar eru fremstar av fjaðrunum.

Týdningur: Tað hevur ikki vinnuligan týdning.

da: Butsnudet skolæst, en: Shortbeard grenadier, ís: Mjóhali

Útbreiðsla: Stuttskeggjað langasporl er úr Grønlandsfirði og undir Íslandi eystur til Føroya. Suðureftir til Asoroyggjarnar og Portugals. Tað er eisini við eysturstrendur Norðuramerika. Er tvær reisir fráboðað av leiðunum vesturi við Lúsabanka og Ytrabanka.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Toskafiskar Gadiformes

Hópurin við toskafiskum hevur 9 ættir 75 slektir og 555 sløg.

Undir Føroyum eru 5 ættir ið hava 26 slektir og 36 sløg:

  • Langasporlsættin (Macrouridae)
  • Moraættin (Moridae)
  • Lýsingsættin (Merlucciidae)
  • Hornabrosmuættin (Phycidae)
  • Toskaættin (Gadidae)

Teir hava heldur stórligt høvd. Teir hava eina til tríggjar ryggfjaðrar og eina ella tvær gotfjaðrar, summir hava stert, aðrir bert ein spíss. Á nøkrum sløgum er roðslan lítil og sløtt, á øðrum stór og rísin. Á flestu sløgunum eru uggafjaðrarnar aftari enn búkfjaðrarnar.

Nógv av sløgunum hava grunnnøs.

Teir eru bæði á grunnum og djúpum vatni. Við Føroyar liva allir toskafiskarnir í sjónum, men okkurt slag úti í heimi er í feskum vatni, og nøkur eru í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017