• Yvirlit
  • Prenta
  • RSS hald
Tú ert her:

Fiskayvirlit

 
Bente Olesen Nystrøm teknaði.

Tarabrosma, bremma (tarabrosmuættin)
Pholis gunnellus (Linné, 1758)

Stødd: Tarabrosma verður upp í 30 cm long, men er sjáldan longri enn 20 cm.

Dýpi: Hon er úr fjøruni og taranum út á umleið 30 metrar, um veturin út á umleið 100 metra dýpi.

Litur: Hon hevur ymsar litir, alt eftir hvar hon er, tó er hon oftast gulbrún við reydligum farra. Marmaramynstrut, ójavnt fløkjaliga brúnliga-ljóslitað er hon um síðurnar. Hon hevur 9-13, oftast 12 døkkar blettir við hvítligum kanti aftur eftir ryggfjaðrafestinum. Undir øsinum, um búkfjaðrarnar, uggafjaðrarnar, og aftast á stertinum er hon oftast appilsinlitt.

Lýsing: Fiskurin er langur, tunnvaksin og høgur. Kroppurin er umleið 8,5 ferðir so langur, sum fiskurin er høgur, og høvdið er umleið eins langt og kropshæddin. Tarabrosma hevur eina ryggfjøður av nakkanum aftur í klingruna. Gotfjøður er ein, og hon er frá gotinum aftur í klingruna og er um helvtina so long sum fiskurin. Hon hevur smáar uggafjaðrar og næstan ósjónligar búkfjaðrar. Sterturin er avrundaður. Hon hevur striku. Gronin er stutt og kjafturin lítil við heldur tjúkkum granum.

Eyðkenni: Longdin á gotfjøðurini og hæddin á kroppinum. Teir stóru blettirnir á ryggfjaðrafestinum. Lítla høvdið.

Týdningur: Tarabrosma hevur ikki vinnuligan týdning.

da: Tangspræl, en: Gunnel, fr: Gonelle, ís: Sprettfiskur, no: Tangsprell, tý: Butterfisch

Útbreiðsla: Tarabrosma er vanlig undir Føroyum, er annars við eysturstrond Amerika frá Cape Cod til Labrador. Hon er undir Suður- og Vesturgrønlandi, Íslandi, Jan Mayen, Svalbarði, í Hvítahavinum og suður við Noregsstrondini. Í Eystarasalti, donskum sjógvi, frá Norðsjónum til Biskeiavíkina, og kring Bretsku Oyggjarnar.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Áburrufiskar Perciformes

Hesin hópurin er størstur av fiskahópunum.

Í hópinum eru 160 ættir, 1539 slektir og 10033 sløg.

Av teimum eru 18 ættir við Føroyar, og hesar hava 29 slektir og 41 sløg:

  • Rekfiskaættin (Polyprionidae)
  • Glómuættin (Epigonidae)
  • Rossamakrelættin (Carangidae)
  • Bramafiskaættin (Bramidae)
  • Ennifiskaættin (Caristiidae)
  • Karpaættin (Sparidae)
  • Úlvfiskaættin (Zoarcidae)
  • Fjaðragrúkaættin (Stichaeidae)
  • Tarabrosmuættin (Pholidae)
  • Steinbítaættin (Anarhichadidae)
  • Nebbasildaættin (Ammodytidae)
  • Tvísygulsættin (Gobiesocidae)
  • Floyfiskaættin (Callionymidae)
  • Stubbafiskaættin (Gobiidae)
  • Nasafiskaættin (Gempylidae)
  • Stinglaksaættin (Trichiuridae)
  • Makrelættin (Scombridae)
  • Svartfiskaættin (Centrolophidae)

Í hópinum er ein størri blanding av fiskum við mongum ymsum frábrigdum og útsjónd, langir og klænir, smáir og stórir, smalir og høgir.

Her eru fiskar, ið hava bleytar teinar í fjaðrunum, og aðrir, ið hava harðar teinar í fjaðrunum. Nakrir hava eina, aðrir hava tvær ryggfjaðrar.

Í karpaættini eru onkur fiskasløg tvíkynjaði.

Undir Føroyum eru bert saltvatnsfiskar í hesum hópinum, men úti í heimi eru eisini sløg, sum eru í feskum vatni og í blandingsvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017