• Yvirlit
  • Prenta
  • RSS hald
Tú ert her:

Fiskayvirlit

 
Astrid Andreasen teknaði.

Trantkongafiskur (kongafiskaættin)
Sebastes mentella (Travin, 1951)

Stødd: Trantkongafiskur verður upp í einar 70 cm langur, vanliga millum 35-45 cm.

Dýpi: Hann er úr 300 metra dýpi niður á 1000 metra dýpi og er vanliga djúpari enn 450 m. Hann er tann av kongafiskunum her á leið, sum er djúpast. Hann er eisini uppi í sjónum yvir djúpum vatni, er onkuntíð fingin í vatnskorpuni á laksalínu norðan fyri Føroyar.

Litur: Hann er reydligur, viðhvørt við appilsinliti. Ofta nakað av grábrúnligum ovast á síðunum og við viólbláum farra, serliga teir smáu sunnan og eystan fyri Føroyar. Hann er ljósur undir búkinum.

Teinar: R XII-IX + 13-16; G II + 8-9.

Lýsing: Trantkongafiskur hevur eina ryggfjøður, teir hørðu teinarnir eru fremstir. Hann hevur eina gotfjøður, hørðu teinarnir eru fremstir, stórar, rundligar uggafjaðrar, og búkfjaðrarnar eru nakað minni. Stóra beinknútu fremst á undirkjaftinum. Hann hevur undirbit. Hann hevur stór eygu, eygnatvørmátið er umleið 1/3 av høvuðlongdini. 5 píkar eru á kápuni. Hann er hávaksin fiskur. Kongafiskasløgini fáa livandi ungar.

Eyðkenni: Trantkongafiskur líkist nógv lítla kongafiski og stóra kongafiski. Tann niðasti og fremsti av teimum 5 píkunum á kápuni vísir niður og eitt vet frameftir. Eygnastøddin og tranturin á undirkjaftinum eyðkenna trantkongafisk.

Týdningur: Trantkongafiskur er virðismikil fiskur og verður nógv veiddur.

da: Dybhavsrødfisk, en: Deepwater redfish, fr: Sébaste du Nord, ís: Djúpkarfi, no: Snabeluer, tý: Schnabelbarsch

Útbreiðsla: Hann er undir Føroyum út av landgrunninum, út av bankunum vestanfyri, á Bankarygginum og Íslandsrygginum. Hann er úr Norskurennu til Svalbarðs og eystur móti Murmansk. Hann er úr Noregi og vestur til Baffinsvíkina og Nova Scotia.

Mouritsen, Rógvi: Fiskar undir Føroyum. Føroya Skúlabókagrunnur og Fiskirannsóknarstovan. Tórshavn. 2007.

Sporðdrekafiskar Scorpaeniformes

Í sporðdrekahópinum eru 26 ættir, ið hava 279 slektir og 1477 sløg.

Av hesum eru undir Føroyum 7 ættir við 17 slektum og 23 sløgum:

  • Kongafiskaættin (Scorpaenidae)
  • Knurrhanaættin (Triglidae)
  • Ulkuættin (Cottidae)
  • Brynjukruttaættin (Agonidae)
  • Huldukruttaættin (Psychrolutidae)
  • Rognkelsisættin (Cyclopteridae)
  • Súgfiskaættin (Liparidae)

Fiskarnir í hesum hópinum eru í stødd smáir til miðal, sterturin er oftast nakað rundaður aftureftir, onkuntíð innbogin, men sjáldan sýldur. Uggafjaðrarnar eru oftast avrundaðar aftan.

Fiskarnir eru oftast klæddir við píkum ella beinplátum um høvd og bul, yvirhøvur hvassir, harðir og knortlutir fiskar.

Sporðdrekafiskar eru um øll høv, onkur sløg eru í blandingsvatni og onkur eisini í feskvatni.

 
 
Nám Hoyvíksvegi 72 Tórshavn Tel. + 298 755150 snar@(if you can see this please update your browser)snar.fo © Nám 2017